SQO-da zańnamany buzǵan bes aýdannyń ákimi jazalandy
PETROPAVL. KAZINFORM — Soltústik Qazaqstan oblysynda memlekettik qyzmet týraly zańnamanyń saqtalýyna júrgizilgen tekserister nátıjesinde 266 adamnyń quqyǵy qorǵaldy.
Memlekettik qyzmet isteri agenttiginiń SQO boıynsha departamentiniń málimetinshe, memlekettik qyzmet salasyndaǵy taldaýlar jáne jumys ýaqyty rejıminiń monıtorıngi aıasynda zań buzý anyqtaldy.
Zań buzýdyń basym bóligi jumys ýaqyty rejıminiń saqtalmaýymen baılanysty. Monıtorıng barysynda 184 memlekettik qyzmetshini tıisti quqyqtyq resimdeýsiz belgilengen jumys ýaqytynan tys jumysqa tartý faktileri anyqtaldy.
— Nátıjesinde bul adamdarǵa demalys kúnderi berilip, artyq istegen jumysy úshin ótemaqy tólendi. Jiberilgen kemshilikter úshin Ákimshilik quqyq buzýshylyq týraly kodeksiniń 89-baby boıynsha 8 laýazymdy tulǵa — 5 aýdan ákimi jáne 3 bólim basshysy ákimshilik jaýapkershilikke tartyldy, — deıdi departament basshysy Erjan Qarymsaqov.
Sondaı-aq, taldaý barysynda is-sapar shyǵyndaryn óteý kezinde zań buzylǵany anyqtalǵan.
Qyzmetshi is-saparǵa shyqqanǵa deıin qarajat aýdarylýy tıis degen talapqa qaramastan, is-sapar somasy tolyq tólenbeýi, artyq tólenýi nemese ýaqytyly aýdarylmaýy faktileri anyqtaldy.
Nátıjesinde 11 memlekettik qyzmetshige 225 myń teńge ústeme aqy tólenip, 2 qyzmetshi artyq tólengen 61 064 teńgeni bıýdjetke qaıtardy.
— Tekserister men tártiptik praktıkaǵa jasalǵan taldaý qorytyndysy boıynsha zańsyz salynǵan 10 tártiptik jazanyń kúshi joıyldy. Bul zań buzý tártiptik jaýapkershilikke tartý rásimderiniń, sonyń ishinde qyzmettik tergeý júrgizý tártibi men merzimderiniń saqtalmaýyna qatysty boldy.
Sonymen qatar, ákimshilik memlekettik laýazymdarǵa ornalasýǵa arnalǵan konkýrstardy ótkizý kezindegi zań buzý da áshkerelendi. Máselen, kandıdattardy konkýrs kezeńderine negizsiz jiberý nemese biliktilik talaptaryna saı keletin úmitkerlerdi qabyldaýdan zańsyz bas tartý faktileri anyqtaldy. Oǵan qosa, konkýrs komıssııasy músheleri ball qoımaý arqyly qatysýshylardy baǵalaý tártibin buzǵan, — deıdi Erjan Qarymsaqov.
Anyqtalǵan faktiler boıynsha tıisti sharalar qabyldanyp, jekelegen konkýrstardyń nátıjeleri joıyldy, al kináli tulǵalar jaýapkershilikke tartyldy.
Buǵan deıin memlekettik qyzmetshi qyzmet barysynda jáne jumystan tys ýaqytta neni bilýi kerek ekenin jazǵan edik.