SQO-da zamanaýı kókónis qoımasy paıdalanýǵa berildi
PETROPAVL. QazAqparat - Soltústik Qazaqstanda jyl boıy kókónis saqtaýǵa arnalǵan zamanaýı qoıma salynyp, qoldanysqa berildi, dep habarlaıdy QazAqparat.
Zaman talabyna saı salynǵan qoımada 2 myń tonnaǵa deıin kókónisti jyl on eki aı saqtaýǵa bolady. Bul óz kezeginde kóktem ýaqytynda kókónis tapshylyǵyn joıyp, syrttan qymbat ónim ákelýge jol bermeıdi. Sáıkesinshe, baǵa da kóterilmeıdi. Petropavl úshin asa qajet nysandy «Radýga» JShS turǵyzǵan.
Buǵan deıin oblysta 4 kókónis qoımasy bolatyn. Biraq olardyń tozyǵy jetken, ári talapqa saı bolmaǵandyqtan kartop-sábizdi uzaq ýaqyt saqtaýǵa kelmeıtin. Jergilikti kásipker Dmıtrıı Sharapaev jańa qoımanyń qurylysyna zamanaýı tehnolgııalardy qoldandy. Nátıjesinde kókónis jańa ónimge deıin shirimeı, sapaly saqtalmaq.
«Bizde buryn kókónis naýryz aıyna deıin saqtalatyn. Óıtkeni, eski qoımalardyń múmkindigi shekteýli. Sondyqtan, naýryz aıynan bastap baǵanyń ósýi baıqalýshy edi. Mine, endi talapqa saı kókónis qoımasy paıda bolyp, kókónis ónimderin shilde aıyna deıin saqtaı alamyz. Osy jerde turaqtandyrý qorynyń 800 tonna ónimi jatady. Baǵany rettep, kerek jaǵdaıda aralasatyn bolamyz. Sóıtip, kókónis baǵasynyń sharyqtaýyna jol bermeımiz», - dedi oblys ákimi Qumar Aqsaqalov.
Strategııalyq mańyzy bar nysan chehııalyq ádispen salynǵan. Kartop, sábiz, qyzylsha, qyryqqabat - bólek-bólek saqtalady. Ol úshin jeldetkishi men salqyndatqyshy bar arnaıy 5 oryn bólingen.
«Ónimderdi jergilikti qojalyqtardan satyp alamyz. Ónimderdi saqtap, kóktemde satýǵa shyǵara bastaımyz. Syrttan jetkizilgen emes, ózimizdiń sapaly ónim bolǵandyqtan baǵa da óspeıdi, suranys ta bolady»,-deıdi kókónis qoımasynyń kýratory Vladımır Mıhaılenko.
Bıyl oblysta kartop pen kókónis bitik shyqty. Jarty mıllıon tonnaǵa jýyq kartop jınaldy. 110 myń tonna kókónis alyndy. Kelesi jyly kókónis alqaptary taǵy da ulǵaıtylmaq.
Illıýstratsııalyq foto
