SQO-da ıývenaldyq polıtsııa 10 kúnniń ishinde 29 zań buzýshylyqty anyqtady
PETROPAVL. QazAqparat - «Bala eńbegin paıdalanýǵa qarsy 12 kún» Ulttyq aqparattyq kampanııasy sheńberinde soltústikqazaqstandyq polıtseıler reıdter júrgizýde, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, Ulttyq aqparattyq kampanııa maýsymnyń biri - balalardyń jazǵy kanıkýline oraı bastaý aldy. Óıtkeni demalysqa shyqqan joǵary synyp oqýshylary osy aralyqta jaldanyp eńbek etip, aqsha tapqylary keledi. Talpynystary durys-aq, alaıda barlyǵy zańǵa saı júzege asýy kerek.
ıÝvenaldyq polıtsııa qyzmetkerleri, quzyrly mekemeler jáne qoǵamdyq uıym ókilderi reıd barysynda balalar jumysqa ornalasýy múmkin saýda oryndaryn, bazarlardy, kóńil kóterý oryndary men saparjaılardy tekserdi.
«Oblysta «Bala eńbegin paıdalanýǵa qarsy 12 kún» aktsııasy aıasynda 541 reıd uıymdastyrylyp, 654 nysan tekserildi. Aktsııanyń maqsaty - balalar eńbegin qanaýǵa jol bermeý. Sol sebepti kásipkerlermen kezdesip, kámelet jasyna tolmaǵandarǵa qatysty eńbek zańnamasyn túsindiremiz. Máselen, 18 jasqa tolmaǵandar túnde eńbek ete almaıdy, olardyń eńbek kúni 4 saǵattan aspaýy kerek. Jasóspirimderge aýyr jáne adamı damýyna nuqsan keletin jumysty istetýge bolmaıdy», - deıdi Jergilikti polıtsııa qyzmetiniń basshysy Aıdyn Baımatov.
Polıtseılerdiń aıtýynsha, túngi reıdter barysynda 29 zańbuzýshylyq anyqtaldy. Olardyń ishinde kámelet jasyna tolmaǵandarǵa durys tárbıe bermeý, jasóspirimderdiń túngi ýaqytta kóshede júrýi jáne olardyń spırttik ishimdikterdi ishýi sekildi jaǵdaılar bar.
«16 jastaǵy jasóspirim qyzdyń anasy polıtsııaǵa aryzdandy. Keshki 23.00-ge deıin suranyp ketken boıjetken belgilengen ýaqytta úıge kelmegen. Qyzdyń aralasatyn adamdaryn surastyryp, onyń ata-anasyn eskertpeı qurbylarymen saıajaıǵa qydyryp ketip qalǵanyn anyqtadyq. Túngi ekiler shamasynda jasóspirimdi baıyz tappaǵan anasyna ákelip tapsyrdyq», - deıdi ıývenaldyq polıtseıler.
Tártip saqshylarynyń aıtýynsha, bul jumystar jaz boıy jalǵasyn tappaq.
