SQO-da VICh juqtyrǵan myńnan astam adam esepte tur
PETROPAVL. QazAqparat – Soltústik Qazaqstan oblysynda adamnyń ımmýn tapshylyǵy vırýsyn juqtyrǵan myńnan asa adam dıspanserlik esepke alynsa, sonyń 14-i bala, dep habarlaıdy QazAqparat tilshisi.
JITS profılaktıkasy jáne oǵan qarsy kúres jónindegi oblystyq ortalyq baspasóz qyzmetiniń habarlaýynsha, bıyl esepte turǵan balalardyń sany birden tórte esege artqan. Syrqat balalardyń kóbeıýine olardyń elimizdiń basqa óńirlerinen, sonyń ishinde Ońtústik Qazaqstan oblysynan kóship kelýi sebep bolǵan.
«VICh juqqan balalardyń eń úlkeniniń jasy búginde 12-de. 2006 jyly, jeltoqsan aıynda týǵan. Otbasynyń tuńǵyshy. Ata-anasymen turady, jalpy bilim beretin mektepte oqıdy. Antıretrovırýsty terapııadan ótip, qajetti dári-dármekti alyp turady», - deıdi ortalyqtyń emdeý-profılaktıkalyq jumystar jáne dıspanserızatsııa bóliminiń meńgerýshisi Olga Shılkına.
SQO-da VICh juqtyrǵan alǵashqy bala Qyzyljar aýdanynda anyqtalǵan. Dárigerlerdiń aıtýynsha, qyz bala únemi Máskeý qalasynda em qabyldaǵan. Alaıda 13 jasynda balalar úıinde qaıtys bolypty.
«Balanyń syrqat ekenin jarııa etýge bizdiń quqymyz joq. Áke-sheshesi jazba túrde ruqsat bergen jaǵdaıda ǵana belgili bir adamdar habardar bolýy múmkin. Jalpy VICh syrqattardyń mártebesin ashpaýdy respýblıkalyq, qoǵamdyq uıymdardyń bastamasymen ótetin arnaıy semınar-trenıngterde úıretedi», - deıdi Olga Shılkına.
Sábılerge kóp jaǵdaıda ınfektsııa anasynan berilse, jasóspirimder esirtki qabyldaý barysynda jáne erte jastan qorǵanyshsyz jynystyq qatynasqa túskende juqtyrady.
Olga Shılkınanyń aıtýynsha, ekiqabat áıelden ınfektsııa tabylǵan jaǵdaıda birden antıretrovırýs terapııasynan ótedi. Sábıge da VICh-ke qarsy dáriler onyń salmaǵyna qaraı sıroppen beriledi. Eger de emdeý sharalary der kezinde qolǵa alynsa, kóp jaǵdaıda bala aýyrmaıdy eken.
