SQO-da VICh-pen aýyratyn 12 bala esepte tur

Soltústik Qazaqstan oblysynda jyl basynan beri 116 adamǵa jańadan VICh dıagnozy qoıyldy, bul ótken jyldyń osy kezeńimen salystyrǵanda 13 syrqatqa kóp, dep habarlaıdy Kazinform.

SQO JITS-tiń aldyn alý jáne oǵan qarsy kúres ortalyǵynyń dırektory Aıman Syzdyqovanyń aıtýynsha, bıyl adamnyń ımmýn tapshylyǵy vırýsyn juqtyrǵandardyń ekeýi – shetel azamaty, qalǵandary el turǵyndary. Qazirgi ýaqytta osy vırýsty juqtyrǵan 1 468 adam ortalyqta esepte tur.

«Aýyrǵandardyń orta jasyna keletin bolsaq, negizinen 40-49 jas aralyǵyndaǵylar. Qaýipti vırýsty er adamdar kóbine juqtyrady. Esepte turǵandardyń 64%-y - erler. VICh juqtyrǵan balalar da bar, 14 jasqa deıingi 12 balaǵa osy dıagnoz qoıylǵan. Aıta ketetin jaıt, sońǵy eki jylda balalar arasynda vırýsty juqtyrýdyń jańa jaǵdaılary tirkelgen joq», - deıdi Aıman Syzdyqova. 

Mamannyń aıtýynsha, VICh-ten emdelmegen jaǵdaıda ol júre paıda bolǵan ımmýn tapshylyǵynyń sındromyna, ıaǵnı, aýrýdyń sońǵy satysyna ulasýy múmkin. Bıyl óńirde SPID-ten eki adam qaıtys boldy, bul ótken jylmen salystyrǵanda 4 adamǵa az. 

«VICh-ti SQO-nyń medıtsınalyq uıymdarynda juqtyrý faktileri tirkelgen joq.
Dıspanserlik esepte turǵandar antıretrovırýsty terapııany ómiriniń sońyna deıin kúndelikti alady. Bul em adam boıyndaǵy vırýsty azaıtady.

Qazirgi ýaqytta antıretrovırýsty terapııanyń jańa túrleri paıda bolyp jatyr. Olardyń janama áseri mınımaldy, nátıjesi joǵary», - deıdi ortalyq dırektory.