SQO-da veterınarlardyń tekserisinen keıin 270 adam jaýapqa tartyldy
PETROPAVL. QazAqparat - Soltústik Qazaqstan oblysynda veterınarlyq zańnamany buzǵan 270 zańdy jáne jeke tulǵaǵa byltyr 6,1 mln teńge aıyppul salyndy, dep habarlaıdy QazAqparat tilshisi.
Byltyr oblys aýmaǵynda veterınarlyq-sanıtarlyq qaýipsizdikti qamtamasyz etý maqsatynda 3 myńǵa jaqyn tekseris júrgizilgen.
Mamandardyń aıtýynsha, veterınarlyq zańnama kóbine maldy tasymaldaý barysynda buzylady. Kóp jaǵdaıda olardyń ilespe qujattary bolmaıdy eken.
«Veterınarlyq baqylaý barlyq aýdanda jaýapkershilikpen júrgiziledi dep aıta almaımyn. Aıyrtaý, Esil, Jambyl, Mamlıýt jáne Tımırıazev aýdandarynda veterınarııa bólimderi jyl boıy birde-bir zańbuzýshylyqty anyqtamaǵan. Alaıda, Petropavl qalasynda mal men olardyń etin qajetti qujatsyz ákelgen 57 adamǵa aıyppul salyndy. Olardyń 8-i Aqqaıyń, 12-si Mamlıýt, 10-y Esil, 11-i Qyzyljar, 3-ýi M.Jumabaev, Taıynsha, Jambyl aýdandarynan jáne 1-ýi Aıyrtaý men Tımırıazev aýdandarynyń turǵyndary», - deıdi SQO Veterınarııa basqarmasynyń jetekshisi Altynbek Abdollaev.
Mal urlyǵyn boldyrmaý maqsatynda 250 reıdtik shara júrgizildi, nátıjesinde maldy, et ónimderin zańsyz tasymaldaýdyń 200-ge jýyq deregi anyqtaldy.
Toltyrylǵan qujattardyń sáıkestigin tekserý barysynda veterınarlyq qujattardyń talapqa saı berilmegendigi de belgili boldy. Osyǵan oraı 11 veterınar mamanǵa ákimshilik shara qoldanyldy.
