SQO-da velosıpedshini qaǵyp óltirgen júrgizýshi oqıǵa ornynan qashyp ketken

PETROPAVL. QazAqparat – Soltústik Qazaqstan oblysynda trassada ketip bara jatqan velosıpedshini qaǵyp ketken kólik júrgizýshisi oqıǵa ornynan boı tasalaǵan, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, 7 tamyz kúni Mamlıýt aýdanynyń polıtsııa bólimine «Qostanaı-Mamlıýtka» avtojolynda, Mamlıýtka qalasynan 3 km jerde er adamnyń denesi jatqandyǵy týraly habar túsken. Qaza tapqan 1971 jyly týǵan Voskresenovka eldi mekeniniń turǵyny bolyp shyqty.

Velosıped mingen er adamdy kólik qaǵyp ketken. Onyń denesi jol jıeginde úsh kúndeı jatyp qalypty.

Jedel izdestirý is-sharalary barysynda polıtsııa qyzmetkerleri «ÝAZ-390945-460» avtokóliginiń júrgizýshisi – 1977 jylǵy Petropavl qalasynyń turǵyny 4 tamyz kúni «Kostanaı-Mamlıýtka» avtojolynda velosıpedshini qaǵyp ketkenin anyqtady. Velosıpedshi oqıǵa ornynda qaıtys bolǵan. Júrgizýshi jol-kólik oqıǵasy ornynan ketip qalǵan.

Atalǵan fakti sotqa deıingi tergep-tekserýdiń biryńǵaı tiziliminde QR QK 345 jáne 347-baptary boıynsha tirkeldi. Ustalǵan kúdikti qamaýǵa alyndy. Qajetti saraptamalar taǵaıyndaldy. Qazirgi ýaqytta tergeý amaldary júrgizilip jatyr. Tergeýdiń nátıjeleri boıynsha protsessýaldyq sheshim qabyldanady.