SQO-da velosıped urysy saýsaq izderi arqyly ustaldy
PETROPAVL. QazAqparat – Soltústik Qazaqstan oblysynda jyl basynan 19 velosıped urlyǵy ashyldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Petropavldaǵy Jambyl kóshesindegi kóp qabatty úıdiń kireberisinen ury 35 myń teńge turatyn «BMHW» velosıpedin qoldy qylǵan. Oqıǵa ornynda tabylǵan saýsaq izi kúdiktini anyqtaýǵa septigin tıgizdi. Nátıjesinde kúdiktiniń buryn sottalǵan 1993 jylǵy qala turǵyny ekeni anyqtaldy. Bul derek «Urlyq» baby boıynsha Sotqa deıingi tergep-tekserýdiń biryńǵaı tizilimine engizildi. Urlanǵan zat alynyp, kúdiktige qatysty kelýge mindetteme alý bultartpaý sharasy taǵaıyndaldy.
«Kireberiste beınebaqylaý bolmaǵan. Kóp jaǵdaıda qylmyskerler dál osyndaı kireberisterdi tańdaıdy. Eger velosıpedti páterde nemese jertólede saqtaý múmkin bolmaǵan jaǵdaıda, ony aıdap áketýge qarsy quraldarmen, myqty arqanmen jabdyqtaý qajet», - deıdi SQO Polıtsııa departamenti Krımınaldyq polıtsııa basqarmasynyń bastyǵy Petr Klımov.
SQO polıtseıleri velosıped ıelerin múlikterine saq bolýǵa shaqyrady. Turǵyndardyń basym kópshiligi kólikterin baspaldaq alańynda saqtaıdy. Qaskóıler kóp qabatty úılerdiń kireberisterine kirý úshin túrli ádisterdi paıdalanady, kóp jaǵdaıda úı turǵyndarynyń úıden shyqqanyn kútip, ishke kiredi.
Jalpy jyl basynan SQO-da 33 velosıped urlyǵy tirkeldi, onyń 19-y ashyldy.
