SQO-da velosıped urlyǵy órshidi
SQO polıtsııa departamenti baspasóz qyzmetiniń málimetinshe, Petropavl qalasyndaǵy Ýnıversalnaıa kóshesinde jasóspirim velosıpedin az ýaqytqa qaraýsyz qaldyrǵan. Bul múmkindikti ury qalt jibermepti. Polıtsııaǵa jedel habarlaýdyń nátıjesindea qaskóı izin sýytpaı ustalyp, velosıped ıesine qaıtaryldy.
Velosıped urlyǵy – maýsymdyq qylmystardyń biri. Ádette mundaı qylmystar jyldyń jyly mezgilinde órshıdi.
Kóbinese qaskóıler domofonmen jabdyqtalǵan úılerdiń aldynda turǵyndardyń kirip-shyǵýyn kútip, esik ashylǵan kezde birge erip ishke kiredi ne bolmasa kez kelgen páterge qońyraý shalyp, ózderin kommýnaldyq qyzmet ókili retinde tanystyrady, dostaryna kelgenin aıtady. Osylaısha, kireberiste turǵan velosıpedterdi, balalar arbalary men basqa da zattardy qoldy etedi.
Sondaı-aq ıeleriniń nazarynan tys qalǵan velosıpedter – qylmyskerlerge ońaı olja. Qos dóńgelekti kólikterdi beınebaqylaý kameralarymen jabdyqtalǵan oryndarda qaldyrǵan jón ári urlyqqa qarsy quraldardy paıdalanǵan durys.
«Birqatar qylmys boıynsha 3,5 jylǵa sottalǵan, buryn isti bolǵan 33 jastaǵy Petropavl turǵyny qazirgi ýaqytta jazasyn ótep jatyr. Ol qaladaǵy úılerdiń jertólelerindegi, qoımalardaǵy qulyptardy buzyp kirip otyrǵan. Er adam urlaǵan zattardyń arasynda eki velosıped te boldy. Esterińizge sala keteıik, úılerdiń kireberisteri men mańyna beınebaqylaý júıesin ornatý, myqty qulyptar paıdalaný múliktik qylmystardyń jasalý qaýpin azaıtyp, tez arada ashylýyna kómektesedi. SQO-da barlyǵy 32 velosıped urlyǵy tirkeldi, onyń 11-i oblys aýdandarynda jasaldy», - deıdi SQO PD krımınaldyq polıtsııa basqarmasynyń bastyǵy Marat Jumalıev.
