SQO-da vaktsına egde jastaǵy adamdarǵa úıine baryp salynady

PETROPAVL. QazAqparat – Soltústik Qazaqstan oblysynda vaktsınatsııa qarqyny tómendep ketken. Ekpe almaǵandardyń basym bóligi - egde jastaǵy adamdar. Olardyń kópshiligine emhanaǵa baryp vaktsınatsııadan ótý qıyn. Sondyqtan búginnen bastap mamandar suranysqa qaraı úılerine baryp ekpe jasaıtyn boldy, dep habarlaıdy QazAqparat tilshisi.

SQO densaýlyq saqtaý basqarmasy basshysynyń mindetin atqarýshy Nurlan Aımanovtyń aıtýynsha, qazirgi ýaqytta kúnine 250-450 adam ǵana koronavırýsqa qarsy ekpe alyp jatyr.

Jazda bul kórsetkish 3-5 myń adamǵa jetken.

Qazirgi kezde negizinen otbasy múshesi qatty aýyryp, sodan keıin ǵana ekpe alýǵa bel býǵandar kep jatyr. Olardyń barlyǵy - ózin-ózi jumyspen qamtyǵandar.

«Áli kúnge deıin qoǵam koronavırýstyń emi joq ekenin túsinbeıdi. Bul ınfektsııa emdelmeıdi. Biz tek onyń belgilerimen kúresemiz. Biz syrqattardy statsıonardan shyǵarǵannan keıin de onyń jaǵdaıy bir jylǵa deıin durystalmaıdy. Biraq muny otbasynda koronavırýspen aýyrǵandar bolmasa, kózben kórmese kóbi túsinbeıdi. Qaýipti ınfektsııa eń aldymen ókpeni zaqymdaıdy. Al ol - adam aǵzasyndaǵy ómir súrýge asa qajet negizgi organdardyń biri. Biz – medıtsınalyq qyzmetkerler, vaktsınatsııanyń nátıjesin kórdik. Iıa, ekpe alyp, aýyryp jatqandar da bar. Juqtyrǵandardyń 56 paıyzy ony jeńil túrde ótkergen. 1224 adam, bul barlyq vaktsına alǵandardyń 0,5 paıyzy, ınfektsııalyq statsıonarlarǵa ortasha aýyryp tústi. Sondaı-aq vaktsınatsııadan ótkenderdiń 63-i jansaqtaý bólimshelerinde jatty. Ekpe alǵan 11 adam qaıtys boldy. Salystyrmaly túrde alsaq bul tómen kórsetkish. Al vaktsına almaǵandarǵa keletin bolsaq, 1 aqpannan osy kúnge deıin 9 416 adam ınfektsııalyq statsıonarda em aldy, olardyń barlyǵyna ottegi apparaty qajet boldy. 1375 jansaqtaý bólimshelerinde jatty», - deıdi Nurlan Aımanov.

SQO-da qazirgi ýaqytta vaktsınanyń birinshi komponentimen 255 myń aldy, bul jospardyń 69 paıyzy. Tolyq kýrstan 238 myńnan astam adam ótti.

Áli de 115 myńnan astam adam ekpe alýy qajet. Olardyń basym bóligi – 60 jastan asqan asqandar.

«Ekpe almaǵandardyń negizgi bóligi Petropavlda jáne bes aýdanda shoǵyrlanǵan. Olardyń bizde tizimi bar. Búginnen bastap biz vaktsınatsııany úıde júrgizýge sheshim qabyldadyq. Óıtkeni keıbir egde jastaǵylar vaktsınany alǵylary keledi, alaıda, emhanaǵa bara almaıdy. Sondyqtan ákimdik ókilderimen baryp, túsindiremiz, mańyzyn aıtamyz, kelisken jaǵdaıda ekpe egemiz. Vaktsına jetkilikti, ekpe pýnktteri bar. Vaktsınatsııadan qorqýdyń qajeti joq, asqynǵan jaǵdaılar tirkelmedi», - deıdi Nurlan Aımanov.