SQO-da úzdik polıtsııa qyzmetkeri avtokólikke ıe boldy
ASTANA. QazAqparat - SQO polıtsııa departamenti ótken jylǵy jumysyn qorytyndylap, úzdik atanǵan polıtsııa qyzmetkerlerine avtokólik jáne aqshalaı sertıfıkattar tabys etti, dep habarlaıdy QazAqparat atalǵan mekemeniń baspasóz qyzmetine silteme jasap.
Polıtsııa departamentiniń málimetinshe, ótken jyly oblysta qylmys jasaý kólemi 5,6%-ǵa tómendedi. Sol sııaqty qoǵamdyq oryndar men kóshelerde jáne de kámeletke tolmaǵandardyń, buryn sottalǵandar men masań kúıde jasalǵan qylmystardyń sanyn azaıtýǵa qol jetkizildi. Sonymen qatar, óńirde eń keń taraǵan qylmys - bótenniń múlkin urlaý sany azaıǵan. Qylmystyń jalpy ashylýy 70,1% qurap, jyl boıy 78 qylmysker ustaldy.
«Arnaıy quralǵan komıssııa egjeı-tegjeıli taldaýdyń negizinde aýdandyq polıtsııa bólimderi jumysynyń qorytyndysy boıynsha reıtıng jasady. «Kadr jáne tárbıe jumysy» nomınatsııasynda ІІІ orynǵa Mamlıýt aýdanynyń polıtsııa bólimi ıe boldy. ІІ oryndy Esil aýdanynyń polıtsııa bólimi enshiledi. І oryndy Taıynsha aýdandyq polıtsııa bóliminiń bastyǵy, polıtsııa podpolkovnıgi Nurlyjan Aqtanov qanjyǵasyna baılap, «LADA Vesta» jańa avtokóliginiń kiltin aldy» delingen habarlamada.
Odan bólek, jedel qyzmettik jumys boıynsha qorytyndy jasaldy. Onyń nátıjesinde ІІІ oryndy Shal aqyn aýdandyq polıtsııa bólimi ıelendi (300 myń teńgeniń sertıfıkatymen birge), ІІ oryn Ýálıhanov aýdanynyń polıtsııa bólimine (500 myń teńgeniń sertıfıkaty) buıyrsa, І oryn men 1 mln teńgeniń sertıfıkaty Jambyl aýdandyq polıtsııa bólimine tabys etildi.
Aıta keteıik, bıylǵy jyl polıtsııa vedomstvosynda «Esirtkisiz bolashaq jyly» dep jarııalanǵan.
