SQO-da úıden órt shyǵyp, 3 adam janyp ketti
PETROPAVL. QazAqparat - SQO Aqqaıyń aýdany Smırnovo ortalyǵynda jeke úı otqa oranyp, 3 adam qaza tapty. Bul týraly oblystyń TJD baspasóz qyzmetinen habarlady.
«2015 jylǵy 6 jeltoqsanda saǵat 07.05-te SQO Aqqaıyń aýdany №9 órt bóliminiń kezekshi dıspetcherine Smırnovo ortalyǵynda samannan salynǵan 1 qabatty jekemenshik úıdiń órtenip jatqany jaıly habarlama tústi. Oqıǵa ornyna dereý órt sóndirýshiler jetti. Jeke quramnan 4 adam jáne bir tehnıka tartyldy. Olar kelgen bette eki bólmeniń biri janyp jatqanyn anyqtady. Jalynnyń 07.26-da beti qaıtyp, 08.27-de tolyqtaı aýyzdyqtaldy. Órtti sóndirý kezinde úsh adamnyń múrdesi tabyldy, 1956 jylǵy er adam, eki 1975 jyly týylǵan er adam jáne áıel», delingen habarlamada.
Úıdegi aǵash eden, tósek oryndar órtenip ketti, jalyn 3 sharshy metrdi sharpyǵan.
Sebebi men materıaldyq shyǵyn anyqtalýda.
