SQO-da úıden eki adamnyń denesi tabyldy
PETROPAVL. QazAqparat – Soltústik Qazaqstan oblysynda anasy men balasynyń denesi úılerinen tabyldy, aldyn ala boljam boıynsha ıis tıip ýlanýlary múmkin, dep habarlaıdy QazAqparat tilshisi.
SQO Tótenshe jaǵdaılar departamentiniń málimetinshe, Taıynsha aýdany Donetskoe eldi mekenindegi turǵyn úıde eki adamnyń denesi tabyldy. Qazirgi ýaqytta oqıǵa ornynda vedomstvonyń jedel-tergeý toby jumys istep jatyr.
«Materıal jınalady, múrdeler sot-medıtsınalyq saraptamaǵa jiberiledi. Tek sodan keıin ǵana aýyl turǵyndarynyń naqty neden qaıtys bolǵanyn aıta alamyz.
Qazirgi ýaqytta marqumdardyń kórshileri surastyrylyp jatyr. Aıtýlarynsha, olar úı turǵyndaryn kópten kórmegendikten alańdaýshylyq bildirgen. Taǵy bir kórshileri marqumdardyń spırttik ishimdikterge jaqyn bolǵanyn aıtty. Sondyqtan, qazir saraptama qorytyndysyn kútemiz. Óıtkeni byltyr osyǵan uqsas jaǵdaı boldy. Jeke úıden eki adamnyń múrdesi tabyldy. Jylytý maýsymy bolǵandyqtan eń aldymen peshten kórip, ıisten ýlanyp óldi dep boljam jasaımyz. Saraptama olardyń basqa nárseden, eger qatelespesem, alkogolden ýlanǵanyn kórsetti», - deıdi SQO TJD basqarmasynyń bastyǵy Dmıtrıı Rastıhın.
Qaıtys bolǵan áıel 54 jasta, ekinshisi — onyń uly, 27 jasta bolǵan.
«Iis tıip ýlandy dep kesip aıtýǵa bolmaıdy. Bizdiń mamandar ol jerde jumys istep jatyr. Olar peshtiń murjasy ashyq bolǵanyn aıtty. Al kórshileri qaıtys bolǵandardy 3 kúnnen artyq kórmepti», - deıdi SQO TJD bastyǵynyń orynbasary Murat Qanǵojınov.
Jyl bastalǵaly SQO-da 224 órt tirkeldi, 16 adam mert boldy, 6 adam jaraqattandy. 24 adam ıis tıip ýlandy. 64 mln teńgeniń materıaldyq shyǵyny keldi.
