SQO-da úıden 3 adamnyń denesi tabyldy, tórtinshisi aýyr halde jatyr

PETROPAVL. QazAqparat – Soltústik Qazaqstan oblysy Novoselovka eldi mekeninde bir úıden úsh adamnyń múrdesi tabyldy. Osy úıdiń tórtinshi turǵyny aýrýhanada jatyr, dep habarlaıdy QazAqparat tilshisi.

Óńirlik kommýnıkatsııalar qyzmetinde SQO tótenshe jaǵdaılar departamenti órtke qatysty aǵymdaǵy jaǵdaıǵa toqtaldy.

Vedomstvo bastyǵynyń orynbasary Dmıtrıı Rastıhınniń aıtýynsha, 6 sáýir kúni Ǵabıt Músirepov atyndaǵy aýdannyń Novoselovka eldi mekeninde týystary óz úıinen úsh adamnyń denesin tapqan.

Tórtinshisi aýyr halde aýdandyq aýrýhanaǵa jetkizildi.

Aldyn ala boljam boıynsha, turǵyndar peshti erte jaýyp, ýly gazdan ıis tıip mert bolǵan.

Qaıtys bolǵan eki áıeldiń bireýi 57 jasta, ekinshisi - 35-te jáne úı ıesi er adam 62 jasta bolǵan.

«Resmı túrde óńirde jylytý maýsymy 20 sáýirge deıin sozylmaq. Degenmen qubylmaly aýa raıyna baılanysty jeke sektor turǵyndarynyń maýsym aıynda da pesh jaǵatyn kezderi bar. Sondyqtan peshtiń durystyǵyn jáne murjasynyń tolyp qalmaýyn únemi baqylap otyrǵan jón. Óıtkeni órt oqıǵalarynyń 77% - osy jeke sektorǵa tıesili», - deıdi SQO Tótenshe jaǵdaılar departamenti bastyǵynyń orynbasary Dmıtrıı Rastıhın.

Jalpy jyl bastalǵaly SQO-da 114 órt tirkeldi. Saldarynan 10 adam qaza taýyp, 4-ýi túrli jaraqat aldy. Al 24 adamǵa ıis tıgen, sonyń bireýi tilge kelmesten qaıtys boldy.