SQO-da uıaly telefon urlyǵyna qatysty 255 derek tirkeldi
PETROPAVL. QazAqparat – Soltústik Qazaqstan oblysynda turǵyndar bıyl uıaly telefon urlyǵyna qatysty polıtseılerge 255 ret aryzdandy, dep habarlaıdy QazAqparat tilshisi SQO polıtsııa departamenti baspasóz qyzmetine silteme jasap.
Vedomstvonyń málimetinshe, urylar úshin uıaly telefon – ońaı olja. Kóp jaǵdaıda qylmystyń bul túri ishimdik ishý barysynda jasalady. Sondaı-aq mundaı urlyqqa negizinen jábirlenýshilerdiń bótelkelesteri barady eken.
Tamyz aıynyń sońynda Petropavl turǵyny páterinen 140 myń teńgeniń «Huawei» markaly uıaly telefony urlanǵanyn aıtyp aryzdandy. Onyń úıinde buryn sottalǵan tanysy qonaqta bolǵan. Páter ıesi mobıldi qurylǵyny qýattandyrýǵa qoıǵan jáne tanysy ketkennen keıin onyń joǵalǵanyn baıqaǵan. Kúdiktini sol kúni tártip saqshylary ustady.
«Uıaly telefondardyń taǵy bir jıi joǵalatyn jeri – kóńil-kóterý oryndary, - deıdi SQO PD krımınaldyq polıtsııa basqarmasynyń bastyǵy Petr Klımov. - Kóbine ishimdikke masaıǵan adamdar telefondaryn joǵaltyp, urlyq týraly aryzymen polıtsııaǵa júginedi. Mundaı jaǵdaılar krımnaldyq statıstıkaǵa kirmeıdi, alaıda olar boıynsha tolyq kólemde jedel-izdestirý is-sharalary ótkiziledi. Taǵy bir jaǵdaıda jábirlenýshiler telefondaryn ústel ústinde qaldyrady. Qaraýsyz qalǵan zatty ótip bara jatqan bireý qoldy qylady. Mundaıda bizge beınebaqylaý kameralary kómekke keledi. Jalpy adamdardan qyraǵylyq tanytyp, óz múlkine saqtyqpen qaraýdy suraımyz».
Jyl basynan SQO-da 255 uıaly telefon urlyǵy tirkeldi. Onyń qazirgi ýaqytta 77-si ashylǵan joq, qalǵandary boıynsha jedel-izdestirý is-sharalary men tergeý áreketteri júrgizilip jatyr.
