SQO-da úı janýarlary jyrtqysh ańdardan qutyrma aýrýyn juqtyryp jatyr
PETROPAVL. QazAqparat – Soltústik Qazaqstan oblysyndaǵy sharýashylyqtardyń birinde iri qara mal qutyrma aýrýyn túlkiden juqtyryp, asyl tuqymdy sıyr ósirýmen aınalysatyn seriktestikke shekteý sharalary engizildi, dep habarlaıdy QazAqparat tilshisi.
SQO veterınarııa basqarmasynyń jetekshisi Berik Áljanovtyń aıtýynsha, Tımırıazev aýdandyq veterınarııalyq qyzmetten jedel habarlama túsken. Dokýchaev eldimekenindegi «Atameken-Agro-Tımırıazevo» JShS-de bir iri qara malda qutyrma aýrýynyń belgileri bolǵan. Sol kúni maldyń kózi joıyldy. Patologııalyq materıal alynyp, zerthanaǵa jetkizildi. Saraptama nátıjesi onyń qutyrma aýrýyn juqtyrǵanyn rastady.
«Veterınarııalyq talaptarǵa saı osy sharýashylyqqa shekteý sharalary engizildi. Ol 60 kúnge sozylady. Bul ýaqytta sharýashylyqtan maldy shyǵarýǵa jáne kirgizýge bolmaıdy. Qazirgi ýaqytta seriktestiktegi basqa maldan aýrý anyqtalǵan joq. Bul dál ýaqytynda tıisti sharalardy qoldanýdyń nátıjesinde múmkin bolyp otyr. ıAǵnı aýrý mal turǵan jer dezınfektsııalandy, aýrý sıyr órtendi. Qalǵan mal baqylaýǵa alyndy», - deıdi Berik Áljanov.
«Atameken-Agro-Tımırıazevo» JShS-gi asyl tuqymdy mal ósirýmen aınalysady. Sharýashylyqta etti baǵyttaǵy 1600 angýs tuqymdas sıyr bar. Janýarlar ashyq qashada turady eken.
«Aýrýdyń paıda bolýynyń negizgi sebebi – jyrtqysh jabaıy ańdardyń eldimekenderge, sharýashylyqtarǵa kirýi. Bıyl qys qatty boldy, jabaıy ańdar qorek taba almaı aýyldarǵa kirip ketti. Olar maldy qaýyp, sıyr sodan juqtyrýy múmkin. Bul joly qaýipti aýrý túlkiden juqqan. Al basqa maldarǵa silekeı arqyly, jemshóp arqyly da juǵýy múmkin. Qazir sharýashylyqta jaǵdaı turaqty», - deıdi basqarma basshysy.
Mamannyń aıtýynsha, qutyrma aýrýyn juqtyrǵan janýardyń silekeıi aǵady, júıke júıesiniń zaqymdanýyna baılanysty qozady. Sýdan, jaryqtan, adamdardan qorqyp, tamaq ishpeı qoıady.
Qutyrma aýrýyna qarsy vaktsına bar. Bıyl SQO boıynsha 53 myń malǵa ekpe jasaý josparlanǵan. Berik Áljanovtyń aıtýynsha, vaktsına alyndy, jumystar júrgizilip jatyr. Ekpe aýrý maldyń oshaǵy tabylǵan ýaqytta sol jaqyn jerdegi maldarǵa egiledi.
Sońǵy ret aqpan aıynda Mamlıýt aýdany Meńgeser aýylyndaǵy jekemenshik malda qutyrma aýry tirkeldi. Ol joly da bir sıyrdan anyqtaldy. Ondaǵy aýrý mal joıylyp, qalǵan sıyrlarǵa tolyq vaktsına egildi.
