SQO-da úı qustarynyń neden qyrylǵany belgili boldy
PETROPAVL. KAZINFORM – Soltústik Qazaqstan oblysy Býgrovoe eldi mekeninde úı qustary pasterellez aýrýynan qyrylǵan.
Býgrovoe aýylynyń turǵyny Maǵjan Aqylbaev qaz sharýashylyǵymen aınalysý úshin 10 mln teńge nesıe alǵan. Eki apta ishinde 5 myń qustyń jartysyna jýyǵy qyrylyp qaldy.
– Buǵan deıin eki ret saraptama pasterellezdi kórsetpedi, tek úshinshisinde ǵana bul aýrý rastalyp otyr. Endi táýelsiz saraptama jasatpaqshymyz. Óıtkeni barlyq belgisi qus tumaýyna keledi. Pasterellez degenge senbeımin. Qanshama qarajat, eńbek esh boldy. Ótemaqy tólengenin qalaımyn, árıne. Óıtkeni 31 jeltoqsanǵa deıin qaryzdy jabýym kerek, - deıdi Maǵjan Aqylbaev.
Kelgen mamandar aýyl turǵynyna qalǵan qusty soıyp alýǵa keńes bergen. Óıtkeni pasterellezdiń emi joq.
– Pasterellez jabaıy qustardan juǵýy múmkin. Aýylda kólder jeterlik. Pasterellezge qarsy em joq, óıtkeni turǵyndar qandaı ǵana antıbıotık bermedi.
Bul aýylda 3 myńnan artyq qus qyryldy. Ólgen qaz mal qorymynda joıyldy. Keıin tereńdigi 3 metrlik or qazylyp, ólgen qus órtelip jatyr. Aýyl ákimi qanshasy joıylǵanyn baqylaýda ustap otyr. Ári qaraı taralmaýy úshin qora-qopsyǵa dezınfektsııa jasalyp jatyr. Erteń bul jumys qaıta júrgiziledi. Eń birinshi bolyp qustary aýyra bastaǵan turǵyndarda 4-5 kún boldy, ólim-jitim toqtady, - deıdi Qyzyljar aýdandyq veterınarlyq stantsııanyń dırektory Erlan Bagenov.
Qyzyljar aýdanynda qus tumaýy sońǵy ret 2020 jyly tirkelgen eken.
– Ólgen qustardan, qanynan jáne túrli múshelerinen úsh ret saraptamaǵa materıal alyndy. Qus tumaýy rastalmady. Tek búgin ǵana saraptama qorytyndysy kelip, pasterellez ekeni anyqtaldy. Eki kún buryn taǵy da qosymsha saraptamaǵa materıal alynyp, jiberildi. Turǵyndardy, árıne, ótemaqy máselesi qyzyqtyrady. 2020 jyly qus tumaýy bolǵanda, 2024 jyly mal-qus sýǵa ketkende esepte bolsyn-bolmasyn – ótemaqy tolyq tólendi. Biraq pasterellez – asa qaýipti aýrýlar tiziliminde joq. ıAǵnı vaktsına da, ótemaqy da qarastyrylmaǵan. Biraq aýdan ákimi bul máseleni sheshýge ýáde etti, bıýdjetten tys qarjy taýyp, tólenedi. Ol erteń aýylǵa ózi baryp, qusy qyrylǵan 14 otbasymen kezdesip, túsindiredi, - deıdi Erlan Bagenov.
Mamannyń aıtýynsha, bıyl Qyzyljar aýdanynda ǵana turǵyndardyń 89 myń qusyna vaktsına egilgen. Byltyr 133 myń bas qusqa tegin vaktsına salyndy.
– Jurttyń keıbiri jasyrady, ekpe tegin bolsa da saldyrmaıdy. Veterınarlar málimetti tek ákimdikterden ǵana alady. Býgrovoe eldi mekeninde nelikten qus jappaı qyryldy. Birinshiden, munda úı qustary kóp shoǵyrlanǵan bolyp shyqty. Sharýashylyq kitabynda qaz-úırekter esepke alynbaǵan. Mysaly turǵyndar kóktemde balapandy satyp aldy, kúzde soıyp, ótkizedi. Biraq zańda anyq jazylǵan, satyp alynǵan úı qusy ne janýar úsh kún ishinde veterınar dárigerge ne ákimdikke habarlanýy kerek, - deıdi veterınar.
Esterińizge salaıyq, buǵan deıin SQO-da úı qustary belgisiz aýrýdan qyrylyp jatqanyn jazǵan edik.
Pavlodar óńirinde de belgisiz indetten 1,5 myńǵa jýyq úı qusy qyrylyp qaldy.