SQO-da ústinen túsken qoryqshyny brakonerler kólikpen baspaq bolǵan
PETROPAVL. KAZINFORM — Soltústik Qazaqstan oblysynda zańsyz elik atqan top sońdaryna túsken qoryqshylardan qashyp qutylmaq bolǵan.
Áleýmettik jelide taraǵan vıdeoda qoryqshylardyń bireýiniń brakonerler mingen kólikke jarmasqany aıtylady. Alaıda olar toqtaýdyń ornyna mamandy súıreı jónelgen.
Oqıǵa Jambyl aýdanynda, ańshylyq sharýashylyq aýmaǵynda bolǵan. Beınejazbadan ustalǵan kúdiktilerdiń jalynyp, ózderin jiberýdi surap, aqsha, jylqy usynǵanyn kórýge bolady. Kólik júrgizýshisi mas bolǵan. Al kóliktiń júk salǵyshynan eliktiń eti tabyldy.
SQO Polıtsııa departamenti baspasóz qyzmetiniń málimetinshe, oqıǵa bıyl 26 qyrkúıekte bolǵan. Zańsyz ańshylyq faktisi boıynsha QR Qylmystyq kodeksiniń 337-baby 3-bóligine sáıkes qylmystyq is tirkeldi.
Aldyn ala málimet boıynsha, bes ańshydan quralǵan top úsh elik atqan. Olardy qoryqshylar toqtatqan. Medıtsınalyq kýálandyrý nátıjesinde ańshylardyń ekeýiniń alkogoldik ishimdik ishkeni anyqtaldy.
— Top quramynda eńbek demalysynda júrgen polıtsııa qyzmetkeri de bolǵan. Qazirgi ýaqytta ol qylmystyq is boıynsha kýáger retinde ótip jatyr. Onyń zańsyz ańshylyqqa nemese janýarlardy zańsyz atýǵa qatysy bul kezeńde anyqtalǵan joq. Osyǵan baılanysty polıtsııa qyzmetkerine qatysty qyzmettik tekseris bastaldy.
Qylmystyq is boıynsha oqıǵanyń barlyq mán-jaıyn anyqtap, oǵan qatysýshylardyń áreketterine quqyqtyq baǵa berý maqsatynda tergeý jáne ózge de protsestik sharalar júrgizilip jatyr, — delingen vedomstvonyń jaýabynda.
Polıtseılerdiń aıtýynsha, tergeý múddesine baılanysty ózge aqparat QR Qylmystyq-protsestik kodeksiniń 201-babyna sáıkes jarııa etilýge jatpaıdy.
Buǵan deıin Aqmola oblysynda ań aýlap júrgen er adam oqys jaǵdaıda mert bolǵanyn jazǵan edik.
