SQO-da ústeme jumysqa zańsyz jegilgen 100-ge jýyq memqyzmetshiniń quqyǵy qorǵaldy
PETROPAVL. KAZINFORM — Soltústik Qazaqstan oblysynda memlekettik organdarda eńbek jáne jumys ýaqyty rejıminiń saqtalýyna baılanysty jyl basynan beri 12 monıtorıng júrgizildi.
QR Memlekettik qyzmet isteri agenttiginiń SQO boıynsha departamentiniń málimetinshe, áli de memlekettik qyzmetshilerdiń jumys rejımin saqtamaý, jumys kúni aıaqtalǵannan keıin zańsyz ústeme jumys isteý faktileri kezdesedi.
— Memlekettik qyzmetshilerdiń eńbek ýaqytyn retteý — memlekettik organdar jumysynyń tıimdiligin jáne memlekettik qyzmetshilerdiń quqyǵyn saqtaýdy qamtamasyz etedi.
Tekserýler memlekettik organdarǵa barý arqyly da, qashyqtan baqylaý júıeleri arqyly da júzege asty.
Monıtorıng barysynda birqatar memlekettik qyzmetshiniń jumys rejımin saqtamaý faktileri anyqtaldy. Jumys kúni aıaqtalǵannan keıin ústeme jumysqa zańsyz tartý jaǵdaılary tirkeldi. ıAǵnı kóp jaǵdaıda tıisti qujattyq resimdeýsiz júrgiziledi, — deıdi QR Memlekettik qyzmet isteri agenttiginiń SQO boıynsha departamentiniń basshysy Erjan Qarymsaqov.
Nátıjesinde, 94 memlekettik qyzmetshiniń quqyǵy qorǵaldy, onyń ishinde 89 qyzmetkerge qosymsha demalys saǵattary berildi, al beseýine aqshalaı ótemaqy tólendi.
— Memlekettik organdardyń basshylaryna baǵynyshty qyzmetkerlerdiń quqyǵyn buzǵany úshin Ákimshilik quqyq buzýshylyq týraly kodekstiń 89-babyna sáıkes ákimshilik jaýapkershilik qarastyrylady.
Desek te, memlekettik qyzmetshi de óz quqyǵyn bilip, artyq jumys isteýge óz erkimen kelisý arqyly basshylyqty jaýapkershilikten bosatpaýy qajet.
Keı jaǵdaıda memlekettik qyzmetshi jumys ýaqyty aıaqtalǵannan keıin ketýge asyqpaıdy. Bul da eńbek tártibin buzý bolyp sanalady jáne ol tártiptik jaýapkershilikke tartylýy múmkin, — deıdi Erjan Qarymsaqov.
Mamannyń aıtýynsha, bul jumys ýaqytynan tys memlekettik múlikti — elektr qýatyn, keńse jabdyqtaryn utymsyz paıdalaný retinde baǵalanady.
Buǵan deıin SQO-da jarty jylda memlekettik qyzmet zańnamasyn buzýdyń 500-ge jýyq faktisi anyqtalǵanyn jazǵan edik.