SQO-da ustazdarǵa arnalǵan «Densaýlyq» baǵdarlamasy iske qosyldy
Ustazdarǵa mundaı demalysty Bilim jáne ǵylym qyzmetkerleri kásipodaǵynyń SQO komıteti uıymdastyryp otyr. Oblystyq bilim basqarmasy baspasóz qyzmetiniń málimetinshe, baǵdarlamaǵa alǵashqylardyń biri bolyp Mamlıýt, M.Jumabaev aýdandarynyń muǵalimderi, kásipodaq músheleri qatysty.
«Densaýlyq» mádenı-saýyqtyrý baǵdarlamasy eki kúnge shaqtalǵan. Ustazdardy sabaqtan bos ýaqytta, ıaǵnı senbi-jeksenbi kúnderi Petropavldaǵy «Transsib» shıpajaıy qabyldaıdy. Onnan astam pedagog emdik dýsh qabyldap, massaj jáne ıngalıatsııalyq emdeý alady. Emdik-saýyqtyrý terapııasynan ótip, basseın men saýnaǵa túsedi.
«Baǵdarlama eki kúnge ǵana shaqtalǵandyqtan ár mınýtyn tıimdi uıymdastyramyz. Birinshi kún negizinen emdik protsedýramen ótedi. Keshke ustazdar boýlıng oınaıdy. Al ekinshi kún mádenı-oıyn-saýyq sharasy ótkiziledi. Muǵalimder oblys ortalyǵyndaǵy mýzeılerdi aralap, «Neptýn» akvaparkinde dem alady. Bul baǵdarlama kásipodaqtyń qarajatyna júzege asyrylyp jatyr», - deıdi bilim qyzmetkerleri kásipodaǵy oblystyq komıteti tóraǵasynyń orynbasary Tatıana Smolına.
Baǵdarlamaǵa óńirdiń ár aýdanynyń ustazdary kezekpen qatyspaq. Uıymdastyrýshylardyń sózine qaraǵanda, muǵalimderdiń jasy, eńbek ótili esepke alynbaıdy.
«Shıpajaı-profılaktorıde em sharalaryn qabyldadyq. Endi saýnaǵa kelip otyrmyz. Óte qýanyshtymyz. Bir sergip qaldyq. Bes kúndik oqý baǵdarlamasyna kóshkendikten jumysymyzǵa kedergi kep jatqan joq. Óte kerek baǵdarlama», - deıdi M.Jumabaev aýdany Benıash ortalaý mektebiniń muǵalimi Álııa Jeksembına.
Kelesi kezekte Jambyl aýdanynyń 14 ustazy em sharalaryn qabyldamaqshy.
