SQO-da ustazdar kásipodaqtyń esebinen sanatorııde em alady
PETROPAVL. QazAqparat – Soltústik Qazaqstan oblysynda úshinshi jyl qatarynan jergilikti kásipodaqtyń bastamasymen «Densaýlyq» mádenı-saýyqtyrý baǵdarlamasy jumys istep jatyr, dep habarlaıdy QazAqparat tilshisi.
Soltústikqazaqstandyq ustazdar úsh kún boıy Býrabaıdaǵy kýrort-meımanhanalardyń birinde dem aldy.
Aıyrtaý, Esil jáne Mamlıýt aýdanynyń 47 muǵalimi akvaparkte bolyp, túrik, orys monshasyna tústi.
Densaýlyqqa paıdaly shýngıt, tuz shahtalaryna kirip, túrli spa-protsedýradan ótti.
«Muǵalimderge mundaı demalystyń bereri kóp. Bir sát kúndelikti kúıbeń tirlikten arylyp, ýaqyttaryn ózderine bóledi. Kúsh-qýat jınap, jumysqa jańa yntamen kirisedi. Bul joly da ustazdarymyz sanatorlyq em aldy, onyń ishinde massaj, ıngalıatsııa, ozekerıto-parafındi protsedýralar, stoýng, jaryq terapııasy jáne basqa kóptegen túrleri bar. Úsh kúnge ǵana shaqtalǵandyqtan baǵdarlama barynsha qyzyqty uıymdastyrylǵan. Túrli ekskýrsııalar, tanymal adamdarmen kezdesý, bı jáne kınoseanstary ótti», - deıdi «Qazaqstandyq salalyq bilim jáne ǵylym qyzmetkerleri kásiptik odaǵynyń Soltústik Qazaqstan oblystyq uıymy» QB ókili Aıgúl Saqypkereeva.
SQO kásipodaq uıymy «Densaýlyq» mádenı-saýyqtyrý baǵdarlamasyn 2019 jyly bastady.
Ustazdar negizinen sabaqtan bos ýaqytta, ıaǵnı senbi-jeksenbi kúnderi shıpajaılardyń birinde demalady.
Baǵdarlamaǵa óńirdiń ár aýdanynyń muǵalimderi kezekpen qatyspaq. Uıymdastyrýshylardyń sózine qaraǵanda, olardyń jasy, eńbek ótili esepke alynbaıdy.
Byltyr 146 adam Petropavldaǵy «Transıb» shıpajaıynda, 142-si «Discovery Borovoe» kýrort-meımanhanasynda dem aldy.
Al bıyl kásipodaq uıymy 600 adamdy demalyspen qamtýdy josparlap otyr.
