SQO-da úsik shalǵan 5 adamnyń jaǵdaıy aýyr
PETROPAVL. QazAqparat – Soltústik Qazaqstan oblysynda sońǵy 10 kúnde úsik shalǵan 13 adam medıtsınalyq kómekke júgingen, beseýine ampýtatsııa jasalmaq, dep habarlaıdy QazAqparat tilshisi.
SQO densaýlyq saqtaý basqarmasy baspasóz qyzmetiniń málimetinshe, Petropavl qalalyq kópbeıindi aýrýhanasynyń jaraqat bólimshesine sońǵy on shaqty kúnde úsik shalǵan 13 adam júgingen. Olardyń beseýi aýrýhanaǵa jatqyzyldy.
«Bes adamnyń jaǵdaıy nashar. 3-4 dárejeli úsik alǵan. ıAǵnı, sýyqtyń áserinen jumsaq et, súıek pen býyn zaqymdalǵan. Mundaı jaǵdaıda
ampýtatsııa jasap, deneniń zaqymdalǵan múshesin kesýge týra keledi. Úsik shalǵan qalǵan naýqastardy qajetti dári-dármekti jazyp, úılerine emdelýge jiberdik», - deıdi Petropavl qalalyq kópbeıindi aýrýhananyń jaraqat bólimshesiniń meńgerýshisi Valerıı Grıbashov.
Jalpy «Qazgıdromettiń» málimetinshe, 25 aqpanda óńirdiń keı jerlerinde burqasyn bolmaq. Soltústik-batystan jel soǵady, keı jerlerde ekpini sekýndyna 15-20 metrge deıin jetpek.
Aýa raıynyń buzylýyna ońtústikten oıysqan tsıklon sebep. Aıaz ben boran aptanyń sońyna deıin saqtalmaq. Aýa temperatýrasy kúndiz -18, túnde keı jerlerde -38 gradýsqa deıin tómendemek.
