SQO-da úsh jasóspirim nashaqor retinde esepke alynǵan

PETROPAVL. KAZINFORM – Soltústik Qazaqstan oblysynda bıyl 191 esirtki qylmysy tirkelip, jarty tonnadan astam túrli psıhoaktıvti zattar men esirtki tárkilendi. Esirtki qylmysymen kúresý úshin keshendi jumys atqarylmaq. 

Petropavlda barlyq deńgeıdegi ákimderdiń qatysýymen jıyn ótip jatyr. Іs-sharada kóterilgen máselelerdiń biri – nashaqorlyqpen kúres.

SQO ákiminiń orynbasary Júsip Jumaǵulovtyń aıtýynsha, óńirde 498 adam nashaqor retinde esepte tur, onyń ishinde 40 áıel jáne úsh bala bar. Ótken jylmen salystyrǵanda áıelder men balalar arasynda nashaqorlar sany artqan. 

«Jumys toby quryldy, uıymdastyrýshylyq, aqparattyq jáne profılaktıkalyq sıpattaǵy 90-nan astam is-sharalardy qamtıtyn keshendi jospar ázirlendi. Kelesi kezeń - ony ár aýdan, ár aýyldyq okrýg deńgeıinde qolǵa alý.

Árbir aýdan ákimi, aýyldyq okrýg ákimi osy jumysqa belsendi qatysýy tıis. Qoǵamnyń barlyq toptaryn: jergilikti belsendilerdi, jastar resýrstyq ortalyqtaryn, sportshylar men aqsaqaldardy tartý qajet.

Biz úkimettik emes ásirese jastar uıymdarynyń álsiz jumysyn kórip otyrmyz, sondyqtan qarjylandyrý deńgeıin arttyryp, jańa jobalardy qalyptastyrý kerek», - dedi Júsip Jumaǵulov.

Oblys ákimi orynbasarynyń aıtýynsha, endi esirtki qylmysynyń aldyn alý jumysy boıynsha aýdan ákimderiniń reıtıngi jasalmaq.

«Reıtıng ár túrli ındıkatorlardan, sonyń ishinde nashaqorlyq deńgeıi týraly jergilikti turǵyndar arasynda júrgizilgen áleýmettik saýalnamadan turady. Qylmys sanynyń ósýi nemese tómendeýi, jergilikti jerlerde júrgiziletin aqparattyq-túsindirý jumystarynyń sany men sapasy da esepke alynady.

Máselen, Aıyrtaý aýdanynda esirtki qylmysy ekeýge, oblys ortalyǵynda 12-ge óskenin kórip otyrmyz», - dedi Júsip Jumaǵulov.

Esirtki qylmysymen kúresý úshin óńirde beınebaqylaý jelisin arttyrý josparlanǵan, taǵamǵa qosatyn kóknár sekildi zattardy satatyn dúkenderge baqylaý kúsheıtilmek.

Buǵan deıin SQO-da jyl basynan beri áıelderge qatysty zorlyq-zombylyq eselep artqanyn jazǵan edik.