SQO-da úsh sibir eligin atqan brakoner ustaldy
PETROPAVL. QazAqparat – Soltústik Qazaqstan oblysynda tártip saqshylary «Barkoner» jedel-profılaktıkalyq is-sharasy barysynda úsh sibir eligin atqan Sergeevka qalasynyń turǵynyn ustady, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, óńirde 6 qańtardan beri «Brakoner» jedel-aldyn alý is sharasy ótip jatyr. Shal aqyn aýdanynda ótken reıdterdiń birinde polıtseıler úsh eliktiń zańsyz atylǵanyn anyqtaǵan. Aýdan ortalyǵy Sergeevka qalasyndaǵy turǵyn úılerdiń birinen ettiń bir bóligi tabyldy. «Zańsyz ańshylyq» baby boıynsha qylmystyq is qozǵaldy.
Zańsyz ań aýlanǵan jerdi anyqtaý úshin tártip saqshylaryna biraz kúsh jumsaýǵa týra kelgen. Aýdannyń tabıǵatty qorǵaý polıtsııasynyń ınspektory, Sergeevka orman sharýashylyǵynyń dırektory jáne qoryqshy kórshi aýdannan qar keshkish tehnıkamen kómekke kelgen polıtseılermen birge aýmaqty shaldy. Nátıjesinde birneshe saǵattan keıin Kókterek aýylynyń mańynda brakonerdiń ańdardy atqan jeri tabyldy. Al elikterdiń terisin olar «Jezqazǵan-Petropavl» avtojolynyń boıyna tastap ketipti.
«Zańsyz ań aýlady» degen kúdikpen Sergeevka qalasynyń 1988 jylǵy turǵyny ustalyp, sottyń sheshimimen qamaýǵa alyndy. Aýdan ortalyǵyndaǵy birneshe úıden eliktiń etteri alynyp, «Yamaha» qar keshkishi, «VAZ 21213» avtokóligi jáne birneshe qarý-jaraq tárkilendi.
«Zańsyz ań aýlaýǵa qatysty qylmystyq zańnamada jaýapkershilik kúsheıtildi. Aıyppul mólsheri 160-tan 3000 AEK deıin ulǵaıtyldy. Endi 200 saǵatqa emes, 800 saǵatqa deıin qoǵamdyq jumysqa tartylady. Buryn eń qatań shara – 50 táýlikke deıin qamaýǵa alynatyn, al shetel azamaty bolsa 5 jylǵa deıin elden shyǵarylatyn. Qazir brakoner 3 jylǵa deıin bas bostandyǵynan aıyrylýy múmkin. Al zańsyz ań aýlaýǵa top bolyp shyǵyp, asa iri kólemde shyǵyn keltirgende nemese sottyń ań aýlaýǵa tyıymy bolǵan jaǵdaıda qylmyskerlerge 10 jylǵa deıin jaza kesiledi», - deıdi SQO PD JPQB tabıǵatty qorǵaý polıtsııa toby bastyǵynyń mindetin atqarýshy Asqat Qojabaev.
«Brakoner» jedel-aldyn alý is-sharasy bastalǵaly oblys polıtseıleri zańsyz ań aýlaýdyń úsh deregin anyqtady. Ańshy myltyǵyn ruqsatsyz saqtaǵany jáne aǵashty zańsyz keskeni úshin 6 ákimshilik is sotqa joldandy. Jeti kýb metr aǵash, 6 sibir eliginiń eti, qar keshkish mashına, 2 avtokólik, 4 myltyq jáne traktor tárkilendi. Barlyǵy 185 zań buzýshylyq anyqtalsa, onyń 98-i ań aýlaý erejelerin buzýǵa qatysty. Operatsııa 5 aqpanǵa deıin jalǵasady.
