SQO-da úsh sarbaz joǵary oqý ornynda tegin oqýǵa grant jeńip aldy
PETROPAVL. KAZINFORM — Soltústik Qazaqstan oblysynda sarbazdar joǵary oqý ornynda bilim alýǵa grant aldy.
Jastardyń úsheýi de qazirgi ýaqytta QR Ulttyq ulany akademııasynda merzimdi áskerı boryshyn atqaryp jatyr. Bul sarbazdar — 12 adamnyń ishinen oq boıy ozyp shyqqandar.
«Byltyrdan bastap QR Qorǵanys mınıstrligi merzimdi áskerı qyzmetten keıin Ulttyq biryńǵaı testileýdi tapsyrýsyz azamattarǵa tegin bilim alý múmkindigin berdi. „Áskerı mindettiler 2.0“ jobasyna Qazaqstan Respýblıkasy Ulttyq ulany akademııasynyń áskerı qyzmetshileri de qatysa alady. Grantqa ótinish bergen kezde sarbazdarǵa úsh joǵary oqý ornyn tańdaý quqyǵy beriledi. Qyzmet barysynda olar upaı jınady — jaýyngerlik daıyndyq jáne basqa da sabaqtardan baǵasy esepke alyndy», — delingen QR Ulttyq ulany akademııasynyń baspasóz habarlamasynda.
Endi oqý úderisin qamtamasyz etý batalonynyń 1-2023 jylǵy merzimdi qyzmetiniń 3 áskerı qyzmetshisi áskerı boryshyn ótep bolǵannan keıin tegin joǵary bilim ala alady.
Qazaq ulttyq agrarlyq zertteý ýnıversıtetiniń sertıfıkaty Ulttyq ulan akademııasynyń oqý úderisin qamtamasyz etý batalony avtomobıl vzvodynyń 3 avtomobıl bólimshesiniń mamany-júrgizýshi, qatardaǵy jaýynger Igor Eskınge tabystaldy.
A. Myrzahmetov atyndaǵy Kókshetaý ýnıversıtetiniń sertıfıkatyn Ulttyq ulan akademııasynyń oqý úderisin qamtamasyz etý batalonynyń jóndeý vzvody qarý-jaraq jáne qorǵanys quraldaryn jóndeý sheberhanasynyń mamany, qatardaǵy jaýynger Denıs Kopylov ıelendi.
QR Ulttyq ulanynyń akademııasynda materıaldyq jáne tehnıkalyq qamtamasyz etý vzvodynyń jóndeý bóliminiń mamany-slesar, qatardaǵy jaýynger Ánýar Áshimov oqıdy.
