SQO-da úsh kúnde páter urlyǵyna qatysty 20-dan astam qylmys ashyldy
PETROPAVL. QazAqparat - Soltústikqazaqstandyq tártip saqshylary páter urlyqtarynyń aldyn alý maqsatynda úsh kúndik jedel-profılaktıkalyq sharasyn ótkizdi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, operatsııa barysynda jedel aqparatty tekserý, urlyq jasaǵan kúdiktilerdi izdestirý, buryn jasalǵan qylmystardy ashý boıynsha jumystar jandandyryldy. Nátıjesinde 23 páter urlyǵy ashyldy. Olardyń 8-i - «ótken jyldar» sanatyndaǵy qylmystar.
"Іri kólemde urlyq jasady" degen kúdikpen 42 jastaǵy qala turǵyny ustaldy. Ol buryn páter tonaǵany úshin isti bolǵan eken. Úı ıeleriniń bolmaǵanyn paıdalanyp, plastık terezelerdi buzyp ishke kirgen ury 1,5 mln teńgeniń múlkin qoldy etken.
Kúdiktiniń aıtýynsha, shkaftan qarakúzen ishik pen bórikti alyp jatqan kezde joǵarydan qorapsha qulaǵan. Onyń ishinde altyn alqa men saqına bolǵan.
Kúdikti tergeý ızolıatoryna qamaldy. Urlanǵan múlik alyndy. Keıin tergeý áreketteri aıaqtalǵan soń buıymdar ıelerine qaıtarylady.
Krımınaldyq polıtsııa basqarmasy mamandarynyń aıtýynsha, oblys aýmaǵynda ótken «Páter» jedel-proflaktıkalyq is-sharasy aıasynda 16 jedel-izdestirý toby qurylyp, urlanǵan múliktiń satyp alynýy jáne satylýy múmkin yqtımal oryndar tekserilgen.
"Soltústik Qazaqstan oblysy aýmaǵynda jyl basynan 256 páter urlyǵy tirkeldi. Byltyr osy aralyqta 299 derek tirkelgen edi. Ótken jylmen salystyrǵanda 14,7%-ǵa azaıdy", - deıdi SQO PD Krımınaldyq polıtsııa basqarmasynyń aǵa jedel ýákili Madııar Harıpov.
Polıtseılerdiń aıtýynsha, urylardan qorǵaný úshin páterlerdi, úılerdi ortalyqtandyrylǵan baqylaý pýltine qosý arqyly jeke kúzet uıymdarynyń baqylaýyna bergen durys. Úılerdiń kireberisterine ornatylǵan beınebaqylaý kameralary da qylmystardyń azaıýyna yqpal etedi eken.
