SQO-da úsh kúnde kóligine jalǵan nómir taqqan 4 adam ustaldy
PETROPAVL. KAZINFORM – Soltústik Qazaqstan oblysynda úsh kún boıy polıtsııa qyzmetkerleri «Jalǵan nómirler» jedel-profılaktıkalyq is-sharasyn ótkizip, 130-dan astam quqyqbuzýshylyqty anyqtady.
SQO Polıtsııa departamenti baspasóz qyzmetiniń málimetinshe, is-shara barysynda óńir joldarynda memlekettik tirkeý nómiri oqylmaıtyn 105 avtokólik, sondaı-aq memlekettik nómiri joq nemese belgilengen tártipke sáıkes kelmeıtin nómiri bar 28 avtokólik anyqtaldy.
Máselen Petropavlda kvadrotsıkl mingen 60 jastaǵy turǵyn aınalma jolda toqtatyldy. Kólik quraly tirkelmegen bolyp shyqty. Zańnamaǵa sáıkes, oǵan 10 AEK mólsherinde aıyppul salyndy.
Kóligine jalǵan memlekettik nómir taqqan tórt júrgizýshi 5 táýlikke ákimshilik qamaýǵa alynyp, bir jyl merzimge kólik quralyn basqarý quqyǵynan aıyryldy. Olardyń ekeýi — Reseıdiń Túmen oblysynyń turǵyndary. Olar «Jezqazǵan- Petropavl» avtojolynda toqtatylǵan. 27 jastaǵysy «Land Rover» avtokóligin, al 33 jastaǵy er adam «Mercedes Benz» markaly kólikti basqarǵan.
Sonymen qatar is-shara ótken úsh kún ishinde óńirde 155 júrgizýshi kólik basqarý kezinde uıaly telefon qoldanǵany úshin, 202 júrgizýshi qaýipsizdik beldigin taqpaǵany úshin ákimshilik jaýapkershilikke tartyldy. Budan bólek, 6 júrgizýshi mas kúıinde kólik basqarǵany úshin ustaldy.
Polıtseılerdiń aıtýynsha, jalǵan memlekettik nómirlerdi anyqtaýda «Megakam.Qorǵaý» zııatkerlik qosymshasynyń kómegi zor. Byltyr polıtsııanyń beınebaqylaý júıeleri arqyly 15,5 myńnan astam avtokólik anyqtaldy. Olardyń ishinde aıyppulyn tólemeı júrgen shamamen 12 myń boryshker, kólik basqarý quqyǵynan aıyrylǵan 9 júrgizýshi jáne jalǵan nómiri bar 4 avtokólik bar.
Jalpy, jyl bastalǵaly oblysta 7 jol-kólik oqıǵasy tirkelip, saldarynan 6 adam mert bolyp, 7 adam jaraqat aldy. Adam ólimimen aıaqtalǵan jol apattarynyń basym bóligi eldi mekenderden tys avtojoldarda bolǵan.
Buǵan deıin Shahtınsk mańynda 50 jolaýshysy bar avtobýs jol apatyna ushyraǵanyn jazǵan edik.