SQO-da úsh kúnde qar qursaýynda qalǵan 200 adam qutqaryldy
PETROPAVL. QazAqparat – Soltústik Qazaqstan oblysynda qutqarýshylar úsh kúnniń ishinde qar qursaýynda qalǵan 71 tehnıkany shyǵaryp, 200 adamdy qutqardy, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, 20-23 naýryz kúnderi óńirde aýa raıy buzylyp, boran soqty. Bul jaıynda uıaly baılanystyń 628 myńnan astam abonentine eskertý SMS habarlamasy jiberildi. Boran ásirese oblystyń Aqjar, Aıyrtaý, Tımırıazev jáne Taıynsha aýdandarynda kúsheıip, respýblıkalyq jáne jergilikti joldarda 12 qar keptelisi týyndady. Saldarynan 71 tehnıka jolda qaldy. Qutqarylǵan 200 adamnyń 13-i - bala.
«Barlyq jaǵdaıda birden is-shara qoldanylyp, azamattyq qorǵanys organdarynyń, jol qyzmeti, jergilikti atqarýshy organdar, polıtsııa men SQO tótenshe jaǵdaılar departamenti qyzmetkerleriniń birlesken is-áreketi nátıjesinde jolaýshylary bar avtokólikter qar qursaýynan shyǵaryldy. Qaza tapqandar men zardap shekkender joq. Qutqarý jumystaryna jeke quramnyń 27-i mamany jáne 22 ınjenerlik tehnıka jumyldyryldy», - dedi vedomstvo ókilderi.
Kúrdeli jaǵdaı Aıyrtaý aýdanynda boldy. Úsh kún ishinde jolda qalyp, qutqarylǵan 200 adamnyń 149-y osy aýdannyń turǵyndary.
