SQO-da úsh kún ishinde otbasylyq janjalǵa qatysty 101 derek tirkeldi
PETROPAVL. QazAqparat – Soltústik Qazaqstan oblysynda 22-24 mamyr aralyǵynda «Turmys» jedel aldyn alý is-sharasy ótip, 101 quqyq buzýshylyq tirkeldi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, úsh kún ishinde polıtseıler turǵylyqty mekenjaıy boıynsha 3 myńǵa jýyq esepte turǵan adamdy tekserdi. Onyń ishinde maskúnemder, nashaqorlar jáne turmystyq zorlyq-zombylyq úshin ákimshilik jaýapkershilikke tartylǵan adamdar bar.
«Polıtseıler turmystyq zorlyq-zombylyq qurbandaryna jan-jaqty kómek kórsetýge daıyn. Otbasyndaǵy kelispeı qalýshylyq qylmysqa ulaspaýy kerek. Úıde jábir kóretin áıelder kóp jaǵdaıda ómirlerine salǵyrttyq tanytyp jatady. Máselen jedel aldyn alý sharasy kezinde otbasylyq-turmystyq qatynastar aıasynda oblys boıynsha 101 quqyq buzýshylyq anyqtaldy, onyń ishinde tek jeteýi ǵana «102» arnasy jáne kezekshi bólimder boıynsha tirkelgen. Qalǵan derekterdi ýchaskelik polıtsııa ınspektorlary tekserý kezinde anyqtaǵan», - dedi SQO PD jergilikti polıtsııa qyzmeti basqarmasynyń bastyǵy Aıdyn Baımatov.
Kóp jaǵdaıda áıelder kúıeýiniń kózinshe olardyń qol kóteretinin aıtýǵa jasqanady. Petropavl qalasyndaǵy yqshamaýdandardyń birinde jasy 30 shamasyndaǵy áıel polıtseılerge soqqy izderin qulaǵannan boldy dep túsindirgen. Alaıda, keıin ýchaskelik ınspektorǵa habarlasyp, kúıeýinen jábir kóretinin aıtqan. Jubaıy onyń izin ańdyp, telefonyn tekseredi eken.
Tártip saqshylary birden polıtsııamen ózara is-qımyl jasaıtyn jáne turmystyq zorlyq-zombylyq máselelerinde kómek kórsetetin qoǵamdyq uıymdarǵa habarlasty. Jábirlenýshige Áıelderdi qoldaý ortalyǵyna ornalasý, Jumyspen qamtý ortalyǵy arqyly bilimin jetildirip jáne jumysqa ornalasý múmkindigi usynyldy. Endi ol ómirin ózgertý úshin polıtsııaǵa ótinish jazýy kerek. Polıtseıler algorıtm boıynsha kómek kórsetedi.
Jalpy «Turmys» jedel aldyn alý is-sharasy kezinde polıtsııanyń profılaktıkalyq jáne tizimdik esebine 439 adam qoıyldy, onyń ishindegi 29-y - turmysy qolaısyz otbasylardan, 92-si - maskúnem, 26-sy - nashaqor.
167 qorǵaý uıǵarymy shyǵarylyp, sotpen 57 adamǵa júris-turysqa qatysty erekshe talaptar belgilendi. 743 ákimshilik quqyq buzý faktisi anyqtaldy, onyń basym kópshiligi qoǵamdyq orynda spırttik ishimdik ishýge baılanysty.
