SQO-da úsh kún ishinde 258 sheteldik kóshi-qon erejesin buzǵan
PETROPAVL. QazAqparat - SQO-nyń kóshi-qon polıtseıleri úsh kún ishinde ereje buzǵan 258 sheteldikti anyqtady, dep habarlaıdy QazAqparat tilshisi.
Elimizde «Zańsyz kelýshi-2019» respýblıkalyq jedel-aldyn alý is sharasynyń alǵashqy kezeńi ótti. Tártip saqshylary operatsııa barysynda tranzıttik aǵyndy tekserdi, sheteldikter arasynda qylmystar men quqyq buzýshylyqtardy anyqtady.
SQO PD Kóshi-qon qyzmeti basqarmasynyń bastyǵy Talǵat Ábilovtiń aıtýynsha, jedel-profılaktıkalyq is-sharanyń maqsaty quqyq buzýshylyqtardy anyqtaý ǵana emes, sonymen qatar sheteldikterge jan-jaqty kómek kórsetý.
Osylaısha Qazaqstan Respýblıkasynyń aýmaǵynda turyp, kóshi-qon zańnamasyn buzǵan Túrkııa eliniń 29 jastaǵy azamatyna kómek berildi. Onyń qujattary durys bolmaı, eline qaıta almaǵan. Kóshi-qon qyzmeti basqarmasynda bul azamatqa quqyqtary men mindetteri túsindirilip, jan-jaqty kómek kórsetildi. El aýmaǵynda turyp, qujattaryn tıisti túrde resimdemegeni úshin ol ákimshilik jaýapkershilikke tartyldy. Budan soń oǵan otanyna qaıtý úshin qajetti qujattardy resimdeýde kómek berildi.
SQO PD baspasóz qyzmetiniń málimetinshe, reıd kezinde kóshi-qon qyzmetiniń qyzmetkerleri bazarlar men saparjaılardy ǵana emes, olar jumys isteıtin qurylys nysandary men oblys arqyly ótetin sheteldik meımandardyń toptasyp turyp jatqan oryndaryn tekserdi.
Oblystyq Polıtsııa departamenti Kóshi-qon qyzmeti basqarmasynyń qyzmetkerleri aıtyp ótkendeı, úsh kúnde Qazaqstan Respýblıkasynda bolý erejelerin buzǵan 258 sheteldik ákimshilik jaýapkershilikke tartyldy.
Sottardyń qaýlylaryna sáıkes olardyń 12-si el aýmaǵynan shyǵaryldy. 75 sheteldikke qatysty olardyń ýaqytsha bolý merzimderin qysqartý týraly sheshim qabyldandy. Shaqyrylǵan sheteldikter bolý erejeleriniń bekitilgen tártibin buzǵany úshin Qazaqstannyń 54 azamaty ákimshilik jaýapqa tartyldy.
«Zańsyz kelýshi-2019» respýblıkalyq operatsııasynyń alǵashqy kezeńi sáýirdiń 12-si kúni aıaqtaldy.
