SQO-da úsh kún ishinde 11 páter urlyǵy ashyldy
SQO Polıtsııa departamenti baspasóz qyzmetiniń málimetinshe, saıajaılarynan oralǵan petropavldyq erli–zaıypty úılerine ury túskenin baıqaǵan. Bireýler kireberistegi joǵary qulypty buzyp, ekinshisin maıystyryp, baspanaǵa kirgen. Úıden 70 myń teńge aqsha joǵalǵanyn anyqtaǵan páter ıeleri, birden polıtsııaǵa habarlaǵan.
Jedel ýákilder kúdiktini «izin sýytpaı» ustady. Ol buryn sotty bolǵan 40 jastaǵy oblys aýdandarynyń biriniń turǵyny bolyp shyqty. Qylmysty tez ashýǵa kópqabatty úı kireberisinde ornatylǵan beınekameralardyń kómegi tıgen.
«Páter» jedel-profılaktıkalyq is-sharasy aıasynda tártip saqshylary qala kóshelerine shyǵyp, saýda ortalyqtarynda, úılerdiń aýlalarynda turǵyndarmen kezdesip, páter urylarynan qalaı saqtanýǵa bolatyny jaıly usynymdar jazylǵan broshıýralar taratty. Qarapaıym keńes: berik qulyp ornatý, úıden shyqqanda terezeler men esikti jaýyp ketý jáne kórshige páterge kóziniń qyryn sala otyrýdy tapsyrý.
«Dabyldar men beınekameralardy ornatýdyń nátıjesi bar. Bul quraldar páter urlyqtarynyń aldyn alýǵa jáne ony jyldam ashýǵa tıimdi. Mamyrdyń 19-21 aralyǵynda ótken operatsııa kezinde buryn jasalǵan osyndaı 11 qylmys ashyldy, onyń 2-i «ótken jyldar» sanatyndaǵy. Taǵy eki urlyqtyń «izi sýymaı» ashyldy. Oblysta jyl basynan osy sııaqty 227 qylmys tirkeldi, búgingi kúni onyń 134-i ashylǵan», - dep habarlaıdy krımınaldyq polıtsııa basqarmasynyń bastyǵy Petr Klımov.