SQO-da úsh genetıka ortalyǵy ashylady
PETROPAVL. QazAqparat - SQO-da mal sharýashylyǵyn damytý úshin úsh genetıka ortalyǵyn ashý josparlanǵan, dep habarlaıdy QazAqparat tilshisi.
SQO ákimdiginiń otyrysynda 2019 jyldyń alǵashqy toqsanynyń qorytyndylary shyǵaryldy. Oblys ákimi baspasóz qyzmetiniń málimetinshe, barlyq baǵyttar boıynsha ósim bar, ekonomıkada - 106,3%, aýyl sharýashylyǵynda ósim - 3,1%. Oblys ákimi "ónimdi qaıta óńdeýge basymdyq beremiz" deıdi.
«Biz et óndirisi kólemin 58 myń tonnaǵa deıin jetkizýimiz kerek. Bizde mal sharýashylyǵy salasynda úsh genetıka ortalyǵy ashylady. Etti qaıta óńdeýdi 45 paıyzǵa deıin ulǵaıtý kerek. Bıyl 5 sút fermasyn iske qosamyz. Osynyń arqasynda sút óndirisiniń kólemin 570 myń tonnaǵa jetkize alamyz. Bıdaıdy qaıta óńdeý kólemi 600 myń tonnaǵa deıin ulǵaımaq», - dedi Qumar Aqsaqalov.
Óndiris 3,8 % ósti, alaıda «ZIKSTO» jáne «PZTM» zaýyttarynda máseleler barshylyq. Oblys ákimi bul baǵytta jumysty kúsheıtýdi tapsyrdy.
«Jumystaryńyz sylbyr. Bári tek áńgime deńgeıinde ǵana. Barlyq múmkindikterdi paıdalaný kerek. 2019 jylǵy basty maqsat - mashına jasaý salasynda óndiris kólemin 30 mlrd teńgege deıin jetkizý», - dedi oblys ákimi.
Qurylys salasynda qarqyn jaman emes, ósim - 21,7% qurady. Investıtsııalar kólemi de 11% ósip, 30 mlrd teńgeni quraǵan. Jıyndy qorytyndylaı kele, aımaq basshysy "barlyq salalarda oń ósim tirkelý kerek" dedi.
