SQO-da úsh balabaqshada qazaqtildi toptar jabyla ma? - Bilim basqarmasynyń jaýaby

PETROPAVL. QazAqparat – Petropavlda úsh mektepke deıingi bilim berý mekemesi senimgerlik basqarýǵa berilip, bul jańalyq áleýmettik jelide qoǵam belsendileriniń talqysyna tústi. Soltústik Qazaqstan oblysy Bilim basqarmasynyń jetekshisi Gúlmıra Kárimova birneshe kúnnen beri ózektiligin joımaı otyrǵan máselege qatysty túsinik berdi, dep habarlaıdy QazAqparat tilshisi.

«Senimgerlik basqarýǵa berilgen 3 mektepke deıingi bilim berý mekemesinde qazaq toptary jabylady, tólemaqy ósti jáne balabaqshalar jekemenshikke ótip, óz týystaryna berildi» degen aqparat birneshe kúnnen beri jurttyń nazarynda júr.

Oblystyq bilim basqarmasynyń basshysy Gúlmıra Kárimova bul jaıynda óziniń jeke áleýmettik paraqshasynda jazba qaldyryp, resmı jaýap berdi.

«Memlekettik-jekeshelik áriptestik týraly Zańǵa sáıkes senimgerlik basqarýǵa beriletin nysandar tizimi anyqtaldy. Úsh mektepke deıingi bilim berý mekemesi satyp alý quqyǵynsyz senimgerlik basqarýǵa ótti. Sonyń biri – Petropavldaǵy «Ivýshka» bóbekjaı-baqshasy. «Esil Aımaqtyq Damytý Ortalyǵy» JShS konkýrstyq qujatty ázirlep, ol táýelsiz saraptamadan ótti. BAQ-ta, «SQO ákimdigi bilim basqarmasynyń» jáne «Tsentr Razvıtııa GChP» AQ resmı saıtynda ashyq konkýrs jarııalandy. Konkýrsqa qatysýǵa úsh ótinish tústi. 2019 jylǵy 14 tamyzdaǵy konkýrstyq komıssııanyń sheshimine oraı «Grand-Broker» JShS jeńimpaz dep tanyldy», - dep túsindirdi Gúlmıra Kárimova.

Bilim basqarmasy jetekshisiniń aıtýynsha, SQO boıynsha Memlekettik ishki aýdıt departamenti konkýrstyń nátıjesin jáne jeńiske jetken kásipkerdiń konkýrstyq qujattaryn tekserip, zań buzýshylyq tappady.

«Petropavl qalalyq bilim bóliminiń basshysy S.M.Ramazanova bos orynǵa 2019 jyldyń 11 qarashasynda taǵaıyndaldy. Sol sebepti ol konkýrstyń nátıjesine esh áser ete almaıdy, ári qalalyq bilim bóliminiń bul konkýrsqa esh qatysy joq. Sondaı-aq, qazaqtildi toptar jabylmaıdy. Balabaqsha tólemaqysy da ózgerissiz qalady» dep jazdy oblystyq bilim basqarmasynyń jetekshisi.

Petropavlda buǵan deıin 85 memlekettik mektepke deıingi bilim berý mekemesi bolsa, sonyń úsheýi - «Ivýshka», «Baldáýren», «Aqbota» senimgerlik basqarýǵa berildi.