SQO-da úsh aıdyń ishinde 300 memqyzmetshi tártiptik jazaǵa tartyldy

PETROPAVL. QazAqparat - SQO memlekettik organdarynda ekinshi toqsanda ákimshilik memlekettik qyzmetshilerge 321 tártiptik jaza qoldanyldy, dep habarlaıdy «QazAqparat» HAA tilshisi oblystyq memlekettik qyzmet isteri jáne sybaılas jemqorlyqqa qarsy is-qımyl departamentiniń baspasóz qyzmetine silteme jasap.

Departamenttiń aqparaty boıynsha, úsh memqyzmetshi qyzmetinen bosatylyp, ekeýi qyzmetinen tómendetilgen, 19 adamǵa qyzmetine tolyq saı kelmeý týraly eskertý berilse, 14 memqyzmetshige - qatań sógis, 103 qyzmetshige - sógis jáne 180 adamǵa - eskertý jarııalanǵan.

Etıka jónindegi sońǵy keńeste 5 tártiptik is qaralǵan. Sonyń biri - Petropavl qalalyq memlekettik kirister basqarmasy basshysynyń orynbasary Esmaǵzum Baıbosynovqa qatysty. Memlekettik kirister departamenti ishki qaýipsizdik basqarmasynyń qyzmettik tergeý materıaly boıynsha, ol ákimshilik materıaldy qaraý merzimin aýystyrý kezinde zaýyttardyń birine zańnan tys artyqshylyq kórsetken. Sheneýnikke qyzmetine tolyq saı kelmeýi týraly eskertý berý usynyldy.

Etıka jónindegi keńeste SQO qoǵamdyq densaýlyq saqtaý departamentiniń qyzmetindegi jemqorlyqtyń qaýpine jasalǵan taldaýdyń nátıjesi qaraldy.

«Departamenttiń basshysyna Qoǵamdyq densaýlyq saqtaý komıtetine joldanǵan usynystardyń oryndalýyn turaqty baqylaýǵa alý usynyldy», - dep habarlady sybaılas jemqorlyqqa qarsy is-qımyl vedomstvosynyń baspasóz qyzmetinde.