SQO-da úsh adam sýǵa ketti
PETROPAVL. QazAqparat – Bir apta ishinde Soltústik Qazaqstan oblysynda ruqsat etilmegen jerde shomylǵan úsh adam sýǵa ketti, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, sýǵa batyp, qaza tapqan adamdardyń sany artyp keledi.
Ǵ.Músirepov atyndaǵy aýdannyń Volodarovka eldi mekeninen 2 shaqyrym jerdegi Esil ózenine shomylýǵa ketken 44 jastaǵy er adam úıine qaıtyp oralmaǵan.
Aıyrtaý aýdanynda da soqtaldaı azamat tilsiz jaýdyń qurbany boldy. 39 jastaǵy er adam Antonovka aýyly mańyndaǵy Kishi Qoskól kóline dostarymen shomylýǵa barǵan. Jaǵalaýdan 40 metrge uzaǵan azamat jaǵaǵa qaıta oralarda kúshi jetpeı, sýǵa bata bastaǵan. Dostary qutqarmaq bolǵanymen, is-áreketteri nátıje bermedi.
Adam ólimimen aıaqtalǵan taǵy bir derek Maǵjan Jumabaev aýdany Uzynkól aýyly mańyndaǵy jasandy qazanshuńqyrda tirkeldi. Jergilikti turǵyndar sol kúni sýǵa shomylýǵa barǵan. Demalys 27 jastaǵy jigittiń ólimimen aıaqtaldy.
«Bul oqıǵalardyń barlyǵy 12 shilde kúni shomylýǵa jaraqtandyrylmaǵan sý qoımalarynda boldy. Qaza tapqandar qarapaıym qaýipsizdik erejelerin saqtamaǵan», - deıdi SQO TJD bastyǵynyń orynbasary Igor Jýkov.
Jalpy oblysta kún jylynǵaly 8 adam sýǵa ketti. Al sońǵy alty jylda 180 adam sý qurbany bolǵan.
