SQO-da urylar mola tonaǵan
PETROPAVL. QazAqparat – Soltústik Qazaqstan oblysynda tártip saqshylary molalardy tonaýǵa qatysty eki qylmysty ashty, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, 3 maýsym kúni Aqqaıyń aýdany Smırnovo eldi mekeniniń turǵyny polıtsııaǵa aryzdanyp, ákesiniń molasynyń qorshaýynan 10 temir shynjyr qoldy bolǵanyn aıtqan. Tártip saqshylary birden túrli-tústi metall qabyldaıtyn oryndardy tekserýge kirisedi. Nátıjesinde osyndaı oryndardyń birinen shynjyrdyń bir bóligi tabyldy. Ony osy aýdan ortalyǵynyń 1987 jyly týǵan turǵyny tapsyrypty. Er adam buryn sottalǵan. «Urlyq» deregi boıynsha sotqa deıingi tergeý bastaldy.
Ekinshi jaǵdaı ýchaskelik polıtsııa ınspektory Aıdar Qýandyqovtyń qyraǵylyǵynyń arqasynda ashyldy. Ol Petropavldaǵy Jumysshy kentinde sómkesinde aýyr júgi bar adamdy baıqaıdy. Teksere kele sómkeniń ishinen zırat qorshaýynyń temir elementteri shyqqan. Jedel qyzmetkerler qorshaýy urlanǵan molany anyqtady. Tonalǵan molada jerlengen adamnyń týystary 1962 jyly týǵan, buryn sottalǵan Jumysshy kentiniń turǵynyna qatysty shara qoldaný týraly aryz jazdy. Bul derek te Sotqa deıingi tergep-tekserýdiń biryńǵaı tizilimine engizildi.
«Biz halyqpen, túrli-tústi metall qabyldaý pýnktteriniń ıelerimen únemi profılaktıkalyq jumystar júrgizemiz. Alaıda, mundaı faktiler jıi bolyp turady. Eki jaǵdaıda da marqumnyń týystary materıaldyq shyǵynnan góri moraldyq soqqy aldy. Mundaı derekterdiń aldyn-alý maqsatynda keshendi jedel-izdestirý is-sharalaryn ótkizemiz», - dedi SQO Polıtsııa departamenti bastyǵynyń orynbasary Rýslan Nazarov.
