SQO-da un eksporty nelikten tómendep ketti
PETROPAVL. QazAqparat - Soltústik Qazaqstan oblysynda un óndirisi tómendedi, dep habarlaıdy QazAqparat.
Oblystyq ákimdiktiń otyrysynda óńirdiń sońǵy segiz aıdaǵy áleýmettik-ekonomıkalyq damý qorytyndysy talqylandy. Oblys ákiminiń orynbasary Asqar Saqypkereevtiń dereginshe, Mamlút aýdanynda ónerkásiptik óndiris kólemi Mamlút un tartý kombınatyndaǵy un óndirisiniń azaıýy saldarynan úsh esege tómendegen. Aıyrtaý aýdanynda da un óndirisi azaıǵany sóz boldy.
Mamlút aýdandyq ákimdiginiń dereginshe, byltyr 8 aıda 10 myń tonna un alynsa, bıyl onyń kólemi bar-joǵy bes myń tonna ǵana. Onyń sebebin jergilikti organdar Ózbekstan jáne Tájikstanmen kelisim bolmaýymen túsindirýde. Qazir un tek Aýǵanstanǵa eksporttalyp jatyr, Qytaımen yntymaqtastyq endi qaralý ústinde.
Oblys ákimi Qumar Aqsaqalov bul másele tıimsiz menedjment saldarynan bolyp otyrǵanyn atap ótti.
«Mamlút un tartý kombınaty byltyr da oıdaǵy kólemge jete almaǵan edi. Eksport joq dep jatyr. Bizdegi birneshe kásiporyn eksporttyń joqtyǵyna shaǵymdanyp otyr. Ózbekstan, Tájikstan naryǵy joq. Biraq, Qytaıǵa jol ashylyp jatyr. Onda astyq, un jiberip jatyrmyz. Sáıkes kelisimder bar. Múmkin, basty másele osy kásiporyndardyń menedjmentinde shyǵar? Atalǵan kásiporyn basshylaryna jańa naryq izdeý qajet, al biz kómektesýimiz kerek. Satyp alýshylardy taýyp, qandaı naryq jáne qandaı baǵa baryn kórsetińder. Bul protseske aralasýymyz kerek, sebebi Mamlút jáne Temirıazov aýdandary jyldar boıy un eksporty máselesin kóterip keledi», - dedi Q.Aqsaqalov.
