SQO-da ýly oıynshyqtar satylyp kelgen
PETROPAVL. QazAqparat – Soltústik Qazaqstan oblysynda quramyndaǵy ýly zattar shekti mólsherden 10 ese artqan oıynshyqtar anyqtaldy, dep habarlaıdy QazAqparat tilshisi.
SQO sanıtarııalyq-epıdemıologııalyq baqylaý departamenti basshysynyń orynbasary Tatıana Gorlovanyń aıtýynsha, mamandar aı saıyn júıeli túrde oıynshyqtardyń sapasyna monıtorıng júrgizedi. Maqsat – bala densaýlyǵyna qaýipti oıynshyqtardy anyqtap, ata-analardy eskertý. Bul jumys oblys aýmaǵyn qamtıdy. Sol úshin saýda oryndarynan ónim satyp alynyp, Keden odaǵynyń tehnıkalyq reglamenti jáne sanıtarııalyq baqylanýy tıis gıgıenalyq talaptaryna sáıkestigi zertteledi.
Bul joly saýda oryndarynan 129 túrli oıynshyqtyń úlgisi satyp alynyp, zerttelgen. Onyń 76-synda, ıaǵnı 60% tehnıkalyq reglament talaby sáıkes kelmegen. Barlyǵynda tańbalaý qaǵıdalary buzylǵan. Al 8 oıynshyqtyń úlgisi fızıko-hımııalyq kórsetkishter boıynsha talapqa saı bolmaı, bala ómiri men densaýlyǵyna qaýip tóndirgen.
«Balalar oıynshyqtarynda toksıkologııalyq zattar – fenol, formaldegıd, ksılol, metıl spırti men geptannyń kólemi shekti mólsherden asqan.
Zertteýge alynǵan oıynshyqtardyń 0,1% ǵana otandyq óndirýshilerdiń ónimi. 45,6% - Eýrazııalyq ekonomıkalyq odaqqa kiretin elderden, 53% - basqa memleketterden jetkizilgen. Talapqa saı kelmeıtin qaýipti oıynshyqtardyń basym bóligi de basqa elderden ákelingen. Sonyń ishinde Qytaıdyń úlesi basym – 62%, Reseıden – 28%, Ózbekstannan – 1,6 % jáne shyqqan jeri kórsetilmegen oıynshyqtardyń úlesi – 2%.
Fızıko-hımııalyq kórsetkishter boıynsha ýly dep tanylǵan oıynshyqtardyń atyn atap, túsin tústesek: balyq aýlaý quraly oıynshyqtar toptamasy. Qytaıda jasalǵan, quramyndaǵy ksılol 0,71 bolǵan, ruqsat etilgen mólsher nebary 0,05. Pıstolettiń quramynda da ksılol birneshe ese kóp, al robotqa aınalatyn tank oıynshyǵynda geptan mólsheri eki ese asyp ketken. «Vkýsnıashka» dep atalatyn oıynshyq ıegi qyshyǵan sábılerge arnalǵan, ıaǵnı ony bala aýzyna salady. Ondaǵy fenol normadan 10 ese artyq. Sondaı-aq «Larısa» degen «monstr» qýyrshaqta formaldegıd eki ese kóp. Qaýipti oıynshyqtardyń qatarynda balalar pıanınosy da bar», - deıdi Tatıana Gorlova.
Málim etilgendeı, oıynshyq satyp alarda onyń ıisi men túsine de mán berý kerek. Sanıtar dáriger Qytaıdyń tym ashyq boıalǵan oıynshyqtaryn satyp almaýǵa keńes beredi. Olarǵa hımııalyq zattar kóp qoldanylady. Taǵy bir eskerer jaıt, oıynshyqtardyń sapa sertıfıkatyna, sáıkestik deklaratsııasyna nazar aýdarǵan jón.
Monıtorıng qorytyndysy boıynsha, anyqtalǵan olqylyqtardy joıýǵa kásipkerlerge uıǵarym berildi. Zań boıynsha tıisti shara qoldanylmaq.
