SQO-da ýly hımıkattar tógilgen jerdiń topyraǵy tekserilip jatyr

PETROPAVL. QazAqparat – Soltústik Qazaqstan oblysy Shal aqyn aýdanynda mamyr aıynyń sońynda ýly hımıkattar jerge tógilip, sol mańdaǵy jelekke zaqym keldi. Óńir basshysy Aıdarbek Saparov bul máseleni nazarda ustap otyrǵanyn málimdedi. Tekseris bitkennen keıin kináliler jaýap bermek, dep habarlaıdy QazAqparat tilshisi.

Maýsym aıynyń basynda áleýmettik jelide Shal aqyn aýdanynda 180 tonnadan astam ammıaktyń orman mańyna tógilgendigi týraly aqparat tarady. Beınejazbadan aǵash japyraqtarynyń sarǵaıyp ketkenin kórýge bolady. Turǵyndar «ýly zat aýa arqyly tarap, ýlanyp qalmaımyz ba?» dep alańdaýshylyq bildirdi.

Osy jaǵdaıǵa baılanysty SQO tabıǵı resýrstar jáne tabıǵat paıdalanýdy retteý basqarmasy túsinik berip, oqıǵanyń Afanasev aýyldyq okrýgindegi Sergeev orman sharýashylyǵy mańynda bolǵanyn aıtty. «Asyl Farm» JShS ýly hımıkattardy tógip alǵan.

SQO ákimi Aıdarbek Saparovtyń aıtýynsha, bul jaǵdaı baqylaýda, qazirgi ýaqytta topyraqtyń quramy taldanyp jatyr.

«Kásiporyn mıneraldy tyńaıtqyshtardy tasymaldaýǵa eski ydystardy paıdalanǵan. Qazirgi ýaqytta «Asyl Farm» JShS qatysty jospardan tys tekseris júrgizilip jatyr. Ekologter oqıǵa ornyna bardy. Zańbuzýshylyqtar anyqtalǵan jaǵdaıda ákimshilik shara qoldanylady jáne kásiporyn olqylyqtardyń ornyn joıýy tıis bolady. Qandaı jaǵdaıda jaýapkershilikke tartylady, bul másele baqylaýda», - dedi Aıdarbek Saparov.