SQO-da ulttyq sanaqtyń birinshi kezeńin ótkizýge 246 adam tartylady

PETROPAVL. QazAqparat – Soltústik Qazaqstan oblysynda búginnen bastap ulttyq sanaqtyń birinshi kezeńi bastaldy. Bir aıdyń ishinde ıntervıýerler óńirdegi barlyq turǵyn úı jáne basqa da nysandardy aralap shyǵýy qajet, dep habarlaıdy QazAqparat tilshisi.

Qazaqstan Respýblıkasy halqynyń ulttyq sanaǵyn ótkizý is-josparyna sáıkes, búginnen bastap SQO-da naýqannyń birinshi – daıyndyq kezeńi bastaldy.

Oblystyq Statıstıka departamenti baspasóz qyzmetiniń málimetinshe, bıylǵy ulttyq halyq sanaǵynyń ereksheligi – qazirgi zamanǵy tehnologııalardyń qoldanylýy. Planshette jumys isteıtin arnaıy «Aýdandastyrý» degen aqparattyq modýl ázirlengen. Oǵan barlyq turǵyn, sondaı-aq turǵyn emes úı-jaılardyń mekenjaılary qamtylǵan «Mekenjaı tirkelimi» aqparattyq júıesi negizge alyndy.

«Ulttyq sanaqtyń birinshi kezeńinde ár ıntervıýer ózine bekitilgen ýchaskeni aralap, ondaǵy turǵyn úılerdiń, basqa da nysandardyń tizimin qurastyryp, árbirinde turaqty turatyn adam sanyn naqtylaıdy. Kartografııalyq materıalǵa qajetti ózgerister engizýi tıis. Sanaq nysandary boıynsha derekterdi maman planshet arqyly elektrondy bazaǵa engizedi. Bul málimet sanaqtyń ekinshi kezeńin ótkizýde ıntervıýerlerge júkteme normalaryna sáıkes halyq sanyn birqalypty bólý úshin jáne jalpy halyqtyń tolyq esepke alynýyn qamtamasyz etý úshin negiz bolady», - deıdi statıstıkalyq aqparatty paıdalanýshylarmen jumys basqarmasynyń bas mamany Álııa Arǵymbaeva.

2-shi kezeń 1 qyrkúıek pen 15 qazan aralyǵynda on-line rejıminde ótkizilmek. Jospar boıynsha bul kezde oblystyń ár turǵyny óz betinshe sanaq.gov.kz saıtynda ózi úshin, sondaı-aq otbasynyń barlyq músheleri úshin saýalnamadan ótedi. Ony mobıldi telefon, derbes kompıýter, planshet arqyly ótýge bolady, saýalnama aıaqtalysymen árbir otbasy múshesine SMS habarlama keledi, ony saqtaý qajet. Keıin 1-30 qazan aralyǵynda halyqty jappaı aralaý ótedi. Sanaqtan onlaın ótpegenderge ıntervıýerler kómektesedi.

«Halyq sanaǵynyń ıntervıýerinde Ulttyq statıstıka bıýrosynyń SQO boıynsha departamentiniń mórimen kýálandyrylǵan ıntervıýer kýáligi, moıynoraýysh jáne halyq sanaǵynyń logotıpi beınelengen kók tústi portfel bolady. SQO-da ulttyq sanaqty ótkizý úshin 3 adamnan turatyn bólim qurylǵan jáne eńbek sharty boıynsha sanaq jónindegi 47 ýákil qabyldanǵan», - deıdi Álııa Arǵymbaeva.

Budan basqa SQO-da ulttyq sanaqtyń birinshi kezeńin ótkizýge 246 nusqaýshy-baqylaýshy men ıntervıýer qabyldanǵan. Olardyń árqaısysy orta eseppen 1 200 úıdi jáne óz ýchaskesindegi basqa da nysandy aralap shyǵýy tıis. Bul qyzmetkerlerge 83 myń teńge eńbekaqy tólenbek.

Ekinshi kezeńdi ótkizýge qosymsha 742 adamdy tartý josparlanǵan. 2 kezeńde bir ıntervıýer 833 adamdy tirkeýi qajet bolady.