SQO-da ýchaskelik polıtsııa ınspektorlary 1 jeltoqsanǵa deıin úıler men páterlerdi aralaıdy
PETROPAVL. QazAqparat – Soltústik Qazaqstan oblysynda polıtseılerdiń «Ýchaske» jedel-profılaktıkalyq is-sharasy ótip jatyr, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, elimizde 7 qyrkúıek bastaý alǵan «Ýchaske» operatsııasynyń maqsaty – oblystyń árbir turǵynyna, aýyldyqtarǵa, qalalyqtarǵa ózderiniń ýchaskelik ınspektorymen tanysýǵa, áńgimelesýge, telefon nómirlerin alýlaryna jaǵdaı jasaý. Oblysta 289 ákimshilik ýchaske bar. 7 qyrkúıekten bastap, oblys boıynsha 5633 jer úı men 2877 páter, onyń ishinde 205 jaldamaly páter aralandy. Sondaı-aq, saıajaılar baqylaýda, 5 myńnan astam saıajaı úıleri tekserildi.
Buryn sottalǵan adamdardy, problemaly otbasylardy, sondaı-aq qarý ıelerin tekserýge erekshe kóńil bólinedi. Basty mindet – qylmystar men quqyq buzýshylyqtardyń aldyn alý jáne ýaqtyly anyqtaý. «Ýchaske» operatsııasynyń basynda ishki ister organdarynda esepte turǵan 844 adam turǵylyqty jeri boıynsha, onyń ishinde bas bostandyǵynan aıyrý oryndarynan shartty túrde merziminen buryn bosatylǵan 120 adam tekserildi. Oblysta 7353 azamattyq qarý ıesi ishki ister organdarynyń esebinde tur. Qyrkúıek aıynyń basynda turǵylyqty jeri boıynsha onyń 669-y tekserilip, 12 buzýshylyq anyqtaldy. 5 birlik atys qarýy alyndy, olardyń barlyǵy tegis uńǵyly qarý bolyp tabylady.
Jalpy óńirde 289 ýchaskelik polıtsııa ınspektory qyzmet atqarady. Olar kún saıyn 202 ýchaskelik polıtsııa pýnktterinde azamattardy qabyldaıdy. Halyqtyń kóp shoǵyrlanýyna baılanysty oblys ortalyǵy – Petropavlda qyzmet kórsetetin polıtseılerdiń júktemesi aýyr. 97 ýchaskelik polıtsııa ınspektory 13 «tirek» pýnktterinde qyzmet kórsetedi. Bıylǵy jylǵy 8 aıdyń ishinde qalalyq ýchaskelik polıtsııa ınspektorlary 1810 qylmystyń betin ashyp, 16 myńnan astam túrli ákimshilik quqyq buzýshylyqtar anyqtady.
«Ýchaske» operatsııasy sheńberinde júıeli profılaktıkalyq jumys qystyń alǵashqy kúnine deıin jalǵasyp, is-shara 1 jeltoqsanda aıaqtalady.
