SQO-da ýchaskelik ınspektorǵa qyzmettik baspana berildi
PETROPAVL. QazAqparat – Soltústik Qazaqstan oblysy Aqqaıyń aýdany polıtsııasynyń ýchaskelik ınspektory jańa jylda baspanaly bolyp, oǵan qyzmettik jańa úıdiń kilti saltanatty túrde tabys etildi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, QR Іshki ister mınıstrligi 2020 jyldy polıtsııanyń ýchaskelik ınspektorlarynyń jyly dep jarııalady. Polıtsııa leıtenanty Azatbek Temirhanuly alǵashqylardyń biri bolyp qyzmettik baspanaǵa qol jetkizdi.
Aqqaıyń aýdanynda ótken jedel keńeste SQO PD bastyǵynyń birinshi orynbasary Dýman Taev Azatbek Temirhanulyna jańa úıdiń kiltin tabys etti. Aýmaǵy 75 sharshy metr bolatyn qyzmettik úı Trýdovoe eldi mekeninde ornalasqan. Ony ýchaskelik ınspektorǵa osyndaǵy «Santa-Marııa» JShS basshysy Pavel Leonov salyp berdi.
SQO-ǵa ońtústik óńirden qonys aýdarǵan Azatbek endi jyly, ári jańa úıde qystap shyǵady. Jas otbasy jaqynda sábıli bolmaq.
«Іshki ister mınıstrligi, polıtsııa departamenti jáne jergilikti atqarýshy bılik tarapynan jasalyp jatqan qamqorlyq bizge qosymsha jaýapkershilik artady. Senim údesinen shyǵyp, júktelgen mindetti abyroımen oryndaýǵa barymdy salamyn», - deıdi jas maman.
Polıtsııa departamentiniń bastyǵy Marat Tólebaevtyń málim etýinshe, polıtsııanyń ýchaskelik ınspektorlary jylynda ýchaskelik pýnktterdiń materıaldyq-tehnıkalyq bazasy nyǵaıtylady. Qyzmetkerlerge jaqsy jaǵdaı jasalady. Buǵan deıin Taıynsha aýdanyndaǵy polıtsııanyń ýchaskelik ınspektory Rýslan Bekbolatov qonys toıyn toılaǵan edi. Oǵan qyzmettik úıdi «Astyq STEM» JShS Qaraǵash aýylynda turǵyzyp berdi.
Polıtsııa departamentinde ótken jedel keńeste vedomstvo basshysy Marat Tólebaev barlyq aýdandyq bólimsheler jetekshilerine ýchaskelik ınspektorlardyń qyzmetin nyǵaıtýda tıisti is-sharalardy qolǵa alýdy tapsyrdy. Jaqynda oblystyń ýchaskelik ınspektorlarynyń turmys jaǵdaıyn anyqtap, bolashaqta olardyń baspana máselesin sheshý maqsatynda monıtorıng júrgizilmek.
