SQO-da ýchaskelik ınspektor qudyqqa qulaǵan sábıdi qutqardy
PETROPAVL. QazAqparat – Soltústik Qazaqstan oblysynda ýchaskelik ınspektor qudyqqa qulaǵan 2,5 jasar sábıdi qutqardy, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń habarlaýynsha, oqıǵa 1 maýsymda Ǵ.Músirepov aýdanynda bolǵan. Alaıda, tártip saqshysy balany qutqarǵandyǵy jóninde eshkimge tis jarmaǵan. Bul oqıǵa jaıynda zeınetker Qoshan Malǵajdarov qoǵamdyq qabyldaý kezinde aıtyp, ýchaskelik ınspektor Altynbek Orazalıevke rızashylyǵyn bildirdi.
Novoıshımka aýylynyń turǵyny 4 jáne 2,5 jasar balasyn ertip mereke ótip jatqan ortalyq alańǵa barǵan. Bir ýaqytta kishi ulynan kóz jazyp qalady. Balany izdeýge aýyldastary da jumylǵanymen, ol nátıje bermegen. Áıel sol kúni merekede kezekshilikte júrgen ýchaskelik ınspektordan kómek suraıdy.
«Men ózim 5 balanyń ákesimin. Sol sebepti osy jastaǵy náresteden ne kútýge bolatynyn bilemin. Jaqyn mańdy qaraýǵa kirisip, aqyryn shyqqan bala daýysyn estidim. Maǵan ol jer astynan estilgendeı boldy. Shyndyǵynda solaı bolyp shyqty. Náreste sýy kepken, shóp basqan eski qudyqqa qulap ketipti. Qudyqtyń beti durys jabylmaǵan eken», - deıdi Altynbek Orazalıev.
Inspektor qoryqqan, jylaǵan, biraq dene jaraqatynan aman balany qudyqtan alyp shyǵyp anasyna tabystaǵan. Ol óziniń bul áreketin erlik dep baǵalamaıdy. Aıtýynsha, onyń ornynda árkim solaı ister edi. Ári ýchaskelik ınspektor bolǵandyqtan turǵyndarǵa kómektesýdi óziniń mindeti dep biledi.
Altynbek Orazalıev polıtsııaǵa qyzmet etýge osydan 11 jyl buryn kelgen eken. 42 jastaǵy tártip saqshysy sol ýaqyttan beri Ǵ.Músirepov aýdanynda abyroımen eńbek etip keledi.
