SQO-da ýaqytsha tirkeý týraly zań normalaryn túsindirý jumystary júrýde
PETROPAVL. QazAqparat - Oblystyq ákimdiktiń apparattyq jınalysynda azamattardy tirkeý týraly zańnama normalaryn túsindirý jumystary talqylandy, dep habarlaıdy «QazAqparat» HAA tilshisi SQO ákiminiń baspasóz qyzmetine silteme jasap.
Kóshi-qon polıtsııasy basqarmasynyń basshysy Erketaı Tutqyshev ýaqytsha tirkeý tártibin túsindirý sharalarynyń qolda bar múmkindikke oraı jasalyp jatqanyn aıtty.
«Ýaqytsha tirkeýdi alý rásimin túsindirý boıynsha aqparattyq materıaldar oblystyq departamenttiń mekemelik portalyna, aqparat agenttikteriniń saıtyna jáne áleýmettik jelige jarııalandy. Arnaıy jadynama qurylyp, barlyq HQKO-larǵa, oblystyń memlekettik organdaryna taratyldy. Onda ýaqytsha tirkeý týraly halyq kóp qoıatyn suraqtar kórsetilgen», - dedi E.Tutqyshev.
Jyl basynan beri oblysta turǵylyqty jeri boıynsha 5070 azamat tirkelgen, onyń ishinde 2900 adam turǵylyqty jeri boıynsha, 2170 adam ýaqytsha mekeni boıynsha tirkeýge turǵan.
