SQO-da «Ýaqytsha otbasy» pılottyq jobasy tıimdiligin kórsetti
PETROPAVL. QazAqparat - Soltústik Qazaqstan oblysynda bıyl qolǵa alynǵan «Ýaqytsha otbasy» pılottyq jobasy jańa oqý jylynda jalǵasyn tabady, dep habarlaıdy QazAqparat tilshisi.
Soltústik Qazaqstan oblysy ákimdiginiń otyrysynda «Ýaqytsha otbasy» jobasynyń barysy talqyǵa tústi.
Oblystyq Bilim basqarmasynyń málimetinshe, óńirde 485 bilim oshaǵy bolsa, sonyń 78 % shaǵyn mektepter. 229 eldi mekende oqý oryndary múlde joq. Balalar kórshi aýyldarǵa baryp-kelip oqýǵa ne ınternatta jatyp bilim alýǵa májbúr. Osy máseleni sheshý úshin óńirde «Ýaqytsha otbasy» jobasy qolǵa alyndy.
«Ýaqytsha otbasy» tek SQO-da ǵana júzege asyp jatqan tájirıbelik joba. Mektebi joq aýyldyń oqýshysyn basqa eldi mekendegi otbasy ýaqytsha qolyna alady. Olar bala úshin jaýap beredi, tárbıeleıdi. Nátıjesinde oqýshylardyń mektepke barmaý, aýyryp qalý jaǵdaılary birneshe ese azaıdy. Balalardyń oqýy túzeldi», - deıdi basqarma jetekshisi Gúlmıra Kárimova.
Joba oblystyń úsh aýdanynda júrgizildi. 61 bala 54 otbasyǵa ornalastyryldy. Máselen, M.Jumabaev aýdanynda 15 otbasy 17 balany qabyldasa, sonyń 13-inde olar oqýshylardyń týystary.
Mamandardyń aıtýynsha, «Ýaqytsha otbasy» jobasy aıasynda balany qamqorlyǵyna alǵan úıelmenge aı saıyn járdemaqy tólenedi.
«Turǵyny az shaǵyn aýyldar ýaqyt óte kele jabylady. Sol sebepti ondaǵy balalarǵa osy bastan jaqsy jaǵdaı jasaýymyz kerek. Ýaqytsha ata-analar eńbekaqy alady. Biz bul joba jaıynda balalardyń, áke-shesheleriniń pikirin bildik. Bári jaqsy baǵasyn berýde. Árıne, ınternatqa qaraǵanda óte tıimdi. Otbasynda ósip, jaqsy tálim-tárbıe alady, únemi eresekterdiń kóz aldynda bolady», - dedi oblys ákimi Qumar Aqsaqalov.
Oblys ákimi jańa oqý jylynda «Ýaqytsha otbasy» jobasyna qatysýshylardyń sany eki esege artatynyn aıtty.
