SQO-da tynyshtyqty buzǵan 750-den astam adam jazalandy
PETROPAVL. QazAqparat – Soltústik Qazaqstan oblysynda túngi ýaqytta jurttyń mazasyn alǵandarǵa aıyppul salynyp jatyr, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, tek bir túnniń ishinde «102» arnasyna saǵat 23.00-den keıin tynyshtyqty buzý boıynsha 8 shaqyrtý túsken.
Tártip saqshylarynyń aıtýynsha, turǵyndardyń barlyǵy birdeı qasaqana kórshileriniń mazasyn alady dep esepteýge bolmaıdy. Máselen túngi saǵat 1.00 shamasynda Astana kóshesindegi úılerdiń birinde turatyn 30 jastaǵy er adam telefonmen balkonda turyp sóılesken. Onyń sóılesken daýsynan oıanǵan kórshisi polıtsııa shaqyratynyn aıtyp, eskertý jasaǵan. Tynyshtyq buzǵan azamat kórshisinen keshirim surap, janjal osymen sheshilgen.
Kámeletke tolmaǵan qyzynyń týǵan kúnin atap ótip jatqan jeke úıdiń turǵyndary da mýzykanyń daýysyn qatty shyǵarǵandaryn moıyndap, kinálaryn túsindi. Kórshileri balasyn uıyqtata almaǵan soń, túngi saǵat 23.00-den keıin polıtsııaǵa habarlasqan. Tynyshtyq buzǵandar ýchaskelik ınspektorǵa ýaqyttyń qalaı ótkenin baıqamaı qalǵandaryn aıtyp, shýdy birden toqtatty.
Taýfık Muhamed-Rahımov kóshesine kórshilerdiń kóptegen shaǵymy boıynsha kelgen polıtseıler páterdiń terezesiniń synǵanyn kórgen. Quqyq buzýshy úı ıesimen ýaqytsha turyp jatqan onyń týysy bolyp shyqty.
«Páterdi jalǵa alýshylar men otbasyndaǵy janjalqoılar tún tynyshtyǵyn jıi buzatyndar. Páter bıýrolarynyń ákimshilerimen jáne jalǵa beriletin úılerdiń ıelerimen túsindirý jumysy jıi júrgiziledi, shart jasaǵan kezde olar klıentterge tynyshtyq rejımin saqtaý qajettigi týraly túsindiredi. Janjalqoılar profılaktıkalyq esepke alynǵan, olardyń basym bóligi maskúnem jáne keıbireýleri turmystyq zorlyq-zombylyq úshin jaýapqa tartylǵan. Ýchaskelik ınspektorlar quqyq buzýshylyqtardy boldyrmaý maqsatynda bul turǵyndarmen profılaktıkalyq áńgime júrgizedi», - deıdi SQO Polıtsııa departamenti bastyǵynyń birinshi orynbasary Qanat Aıtbaev.
Jalpy jyl basynan oblysta tynyshtyqty buzǵan 769 adam jaýapqa tartyldy. Quqyq buzýshylyqtyń bul túrine 5 AEK mólsherinde aıyppul qarastyrylǵan. Bir jyldyń ishinde qaıtalap buzsa, 10 AEK shamasynda aıyppul tóleýge týra keledi. Kásipkerlik sýbektilerine jáne kommertsııalyq emes uıymdarǵa menshik túrine qaraı 20-dan 100-ge deıin AEK aıyppul salynady, qaıtadan buzsa aıyppul mólsheri eki ese artady.
