SQO-da tynyshtyqty buzǵan 500-den astam adam jaýapqa tartyldy
PETROPAVL. QazAqparat – Soltústik Qazaqstan oblysynda mezgilsiz ýaqytta tynyshtyqty buzǵan 500-den astam adam jaýapqa tartyldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, turǵyndar tynyshtyqty buzatyn kórshilerine qatysty polıtsııaǵa jıi aryzdanady. Petropavldaǵy Ýlıanov kóshesiniń turǵyndary da saǵat 23.00-den keıin «102» pýltine habarlasyp, páterlerdiń birinde mýzykanyń qatty qosylǵandyǵyn aıtyp, shaǵymdanǵan. Shaqyrtý boıynsha barǵan ýchaskelik polıtsııa ınspektory páterde mýzykany qosyp, alkogol iship demalmaqshy bolǵan bas qosqandardy anyqtady. Páter ıesine «Tynyshtyqty buzý» baby boıynsha hattama toltyryldy.
«Ýchaskelik ınspektorlar halyqtyń aryzdaryna jedel áreket etýge basymdyq beredi. Tıimdilikti arttyrý úshin sońǵy eki jyldan beri petropavldyq patrýldi polıtsııa batalonynyń qyzmetkerleri men ýchaskelik polıtsııa ınspektorlary birlesken túngi kezekshilikterge shyǵyp júr. Kúndiz patrýl ekıpajy eki-úsh shaqyrtýǵa baryp úlgeredi, túnde shaqyrtýlardyń sany artady. Basym bóligi ýchaskelik polıtsııa ınspektorlarynyń jelisi boıynsha, ıaǵnı tynyshtyqty buzý, otbasydaǵy zorlyq-zombylyq, mas adamdardyń janjaly», - deıdi Petropavl polıtsııa basqarmasynyń bólim bastyǵy Rýstam Sadýlov.
Ár tún saıyn Petropavl kóshelerine 12 patrýldik ekıpaj kezekshilikke shyǵady. Ortalyqta, birinshi jáne ekinshi polıtsııa bólimderiniń aýmaǵynda júretin úsh ekıpajdyń quramynda ýchaskelik ınspektorlar bolady. Al juma jáne senbi kúnderi patrýldik polıtseılermen birge túngi kezekshilikke alty ýchaskelik polıtsııa ınspektory attanady.
Jyl basynan tártip saqshylary SQO aýmaǵynda túngi ýaqytta tynyshtyqty buzǵan 567 shaqyrtýǵa baryp, shara qoldandy.
