SQO-da týysyna ókpelep, úıden ketken 14 jasar bala Petropavldan tabyldy
PETROPAVL. QazAqparat – Soltústik Qazaqstan oblysy Mamlıýt aýdanynda joǵalǵan 14 jastaǵy jasóspirim aman-esen Petropavldan tabyldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, 14 jastaǵy jasóspirimniń joǵalǵany týraly Mamlıýt aýdanynyń polıtsııa qyzmetkerleri WhatsApp messendjerinen bilgen eken.
Mektep oqýshysy urystan keıin týysynyń úıinen ketip qalǵan.
Jasóspirimdi tabý úshin aýdandyq polıtsııa qyzmetkerleri jumyldyryldy.
Tártip saqshylary beınebaqylaý kameralaryn qaraý kezinde jasóspirimniń kúndizgi saǵat 12.00 shamasynda aýdan ortalyǵynan Petropavlǵa ketkenin anyqtady.
Er bala jol-jónekeı kezdesken kólikke mingen eken. Іzdeýge «Lider.KZ» volonterleri qosylyp, áleýmettik jelilerde jasóspirim jaıynda baǵyttama taratty.
«Qarańǵy túsýi, balada uıaly telefonnyń bolmaýy izdeýge qıyndyq týǵyzdy. Joǵalǵanǵa qatysty baǵyttama barlyq áleýmettik jeliler men Mamlıýt jáne Petropavl qalasynyń messendjerlerine taratyldy», - deıdi Mamlıýt aýdany polıtsııa bólimi krımınaldyq polıtsııa bólimshesiniń bastyǵy Erlan Dáýletov.
Joǵalǵan jasóspirim aman-esen tabyldy. Ony Petropavldaǵy kópqabatty úılerdiń biriniń kireberisinde túngi saǵat 2.00 shamasynda turǵyn baıqap qalǵan.
Áıel birden volonterler kórsetken nómirge habarlaǵan. Ol polıtsııa kelgenshe balanyń qasynda bolǵan. Sol túni mektep oqýshysy anasymen qaýyshty.
Jyl basynan beri SQO-da iz-túzsiz joǵalǵan 219 adam tabyldy.
