SQO-da tutynýshylardan túsken shaǵymdar sany shamamen eki esege artqan

PETROPAVL. KAZINFORM — Soltústik Qazaqstan oblysynda bıylǵy on aıda tutynýshylardan 818 ótinish tústi.

tutynýshy
Kollaj: Kazinform/ Nano Banana

SQO boıynsha Saýda jáne tutynýshylardyń quqyǵyn qorǵaý departamentiniń málimetinshe, bul byltyrǵy sáıkes kezeńmen salystyrǵanda eki esege kóp.

Departament mamandarynyń kómegimen turǵyndarǵa 23 mln teńgeden astam qarajat qaıtaryldy.

— Qaralǵan 818 ótinishtiń 575-i «e-Otinish» arqyly, 118-i jedel jeli telefonyna habarlasý arqyly, al 125-i jeke qabyldaýda tústi. Ótken jyldyń osy kezeńinde departament 427 ótinishti qaraǵan edi. Al mamandardyń kómegimen tutynýshylarǵa byltyr 16,1 mln teńge qaıtarylǵan edi, — deıdi departament basshysynyń orynbasary Ǵalymjan Abaev.

Turǵyndar kóbine bólshek jáne elektrondyq saýdaǵa, sondaı-aq turmystyq qyzmet kórsetý salasyna qatysty habarlasqan. Ádette satyp alýshylar taýardyń nemese qyzmettiń kútken nátıjege sáıkes kelmeýine, satýshynyń ónim týraly tolyq ári naqty aqparat bermeýine baılanysty shaǵymdanǵan. 

— Zań talaptaryn buzǵany úshin bıyl 23 kásipkerlik sýbektisi ákimshilik jaýapkershilikke tartyldy. Byltyr 22 kásipker jazalanǵan edi.
Daý týyndaǵan jaǵdaıda tutynýshy satýshyǵa, daıyndaýshyǵa nemese oryndaýshyǵa jazbasha narazylyq jiberýge quqyly. Narazylyqty alǵan kúnnen bastap kúntizbelik on kún ishinde jazbasha jaýap berilmese nemese talaptardy qanaǵattandyrýdan bas tartylsa, tutynýshy tutynýshylardyń quqyqtaryn qorǵaý salasyndaǵy memlekettik organǵa júgine alady, — deıdi Ǵalymjan Abaev.

Buǵan deıin Batys Qazaqstanda tutynýshylarǵa 35,5 mln teńge keri qaıtarylǵanyn jazǵan edik.