SQO-da tutynýshy ótinishin elemegen kompanııa 6,2 mln teńge aıyppul tóledi

PETROPAVL. KAZINFORM – Soltústik Qazaqstan oblysynda turǵynnyń ótinishinen keıin elektrmen qamtýshy kompanııaǵa ákimshilik jaza qoldanyldy.

«Sevkazenergosbyt» JShS tutynýshyǵa kórsetilgen qyzmetter týraly málimetterdi berýden bas tartqan.

QR Ulttyq ekonomıka mınıstrligi Tabıǵı monopolııalardy retteý komıtetiniń málimetinshe, vedomstvonyń SQO boıynsha departamentiniń atyna tutynýshynyń ótinishi kelip tústi. Tekserý kezinde «Sevkazenergosbyt» JShS-niń ótinish berýshige rettelip kórsetiletin qyzmetter týraly suraýǵa aqparat usynbaǵany anyqtalǵan. Bul «Tabıǵı monopolııalar týraly» Qazaqstan Respýblıkasy Zańynyń 26-baby 2-tarmaǵynyń 12) tarmaqshasyn buzý bolyp esepteledi.

Osyǵan baılanysty, «Sevkazenergosbyt» JShS Qazaqstan Respýblıkasynyń Ákimshilik quqyq buzýshylyq týraly Kodeksiniń 164-babynyń 4-bóligi boıynsha ákimshilik jaýapkershilikke tartylyp, kompanııaǵa 6 291 200 teńge mólsherinde aıyppul salyndy.

Buǵan deıin SQO-nyń energetıkalyq kásiporyndaryna 550 maman jetispeıtinin jazǵan edik.